4 sáýir kúni tústen keıin Besqaraǵaı aýdanyna qarasty Qoıanbaı aýyly mańynda qurǵaq shóp órtengeni týraly aqparat túsken bolatyn. Jeldiń ekpinimen órt «Semeı ormany» tabıǵı rezervatynyń Morozov fılıaly aýmaǵyna jetken.
Oqıǵa ornyna dereý órt sóndirý bólimderi, arnaıy tehnıka men orman sharýashylyǵy qyzmetkerleri jumyldyryldy. О́rt sóndirýge Abaı, Shyǵys Qazaqstan, Pavlodar oblystarynyń Tótenshe jaǵdaılar departamentteri, «Semeı ormany» men «Ertis ormany» mekemeleriniń qyzmetkerleri jáne jergilikti atqarýshy organdar atsalysyp jatyr.
Jaǵdaıdy baqylaý úshin oqıǵa ornyna Abaı oblysynyń ákimi Berik Ýálı baryp, jedel shtab otyrysyn ótkizdi. Oblys ákiminiń orynbasary Dımıtrıı Garıkov pen TJD bastyǵy Manarbek Shapaǵatov óńir basshysyna ahýal jaıly baıandady.
О́rtti sóndirýge barlyǵy 353 adam, 130-ǵa jýyq tehnıka jáne 1 tikushaq tartyldy. Qazirgi ýaqytta órttiń taralýy toqtaǵan, jaǵdaı turaqtanyp keledi. Mamandardyń aıtýynsha, jańbyrly aýa raıy órtti sóndirýge qolaıly jaǵdaı týǵyzǵan.
Oblys ákimi órt tolyq sóndirilgenge deıin jaǵdaı qatań baqylaýda bolatynyn aıtyp, tıisti tapsyrmalar berdi.
– Eń bastysy – adamdardyń ómiri men qaýipsizdigi. Barlyq tehnıka men múmkindikter jumyldyrylýy tıis. Qazir О́skemen men Pavlodardan kómek kele jatyr. Tańerteń tikushaqpen órt bolǵan aýmaqty sholyp shyǵamyn. Jaǵdaı tikeleı baqylaýymda bolady, – dedi Berik Ýálı.
Ázirge eldi mekenderge qaýip tónip turǵan joq. Aımaqtaǵy ahýal tolyq qadaǵalanyp otyr.
Abaı oblysy