Qazaqstanda sý qaýipsizdigi men resýrstardy basqarý máselesi stýdentter debatynda synǵa alyndy.
Qazaqstan sýǵa baı memleket bolǵanymen, ony tıimdi paıdalaný men basqarý máseleleri áli kúnge deıin sheshimin tappaı keledi. Osy kúrdeli taqyryp «Habar» telearnasyndaǵy “Azamat” ıntellektýaldy pikirsaıys baǵdarlamasynyń jańa shyǵarylymynda qyzý talqylandy. Stýdentterdiń ótkir pikirleri men naqty usynystary sýdy basqarýdyń búgingi ahýalyna jańa kózqaras usyndy.
Pikirsaıys alańynda Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń jáne Turan ýnıversıtetiniń komandalary sý tapshylyǵy, ınfraqurylymnyń tozýy jáne resýrstardy tıimsiz basqarý máselelerin tereń taldady.
Batys Qazaqstan agrarlyq-tehnıkalyq ýnıversıtetiniń stýdentteri eldegi tutynylatyn sýdyń 60–70 paıyzy ózenderden alynatynyn, al olardyń kópshiligi shekaralas memleketterden bastaý alatynyn atap ótti. Stýdentterdiń aıtýynsha, transshekaralyq táýeldilik klımattyq ózgerister jaǵdaıynda eldiń sý qaýipsizdigine qater tóndirýi múmkin. Olar sý tapshylyǵyn azaıtý úshin: jańa sý qoımalaryn salýdy; sý salasy úshin kásibı mamandar daıarlaýdy; óndiris oryndaryna sýdy qaıta óńdeý júıelerin mindetteýdi; turmystyq sektorǵa sensorly sý esepteýishter engizýdi usyndy. Sonymen qatar, tutyný kólemine qaraı dıfferensıaldy tarıf júıesin engizý qajettigi de qozǵaldy.
Turan ýnıversıtetiniń stýdentteri óz kezeginde sýdyń 65 paıyzy aýyl sharýashylyǵynda qoldanylatynyn, biraq onyń jartysynan kóbi eski sýarý júıeleriniń kesirinen ysyrap bolatynyn málimdedi. Olar tamshylatyp sýarý ádisin jappaı engizýdi jáne qaldyq sýlardy qaıta óńdeý deńgeıin arttyrýdy, bıologııalyq, mehanıkalyq jáne membranalyq tazartý tehnologııalaryn kezeń-kezeńimen iske qosýdy usyndy. Búgingi kúni Qazaqstanda qaldyq sýdy qaıta óńdeý kórsetkishi nebári 2,5%, al damyǵan Eýropa elderinde bul kórsetkish 80–90% aralyǵynda.
Qazylar alqasynyń sheshimi boıynsha Turan ýnıversıtetiniń komandasy jeńiske jetti. Sarapshylar olardyń máselege tereń taldaý jasap, naqty ári júzege asyrýǵa bolatyn usynystar usynǵanyn erekshe baǵalady. Baǵdarlama tóreshileri qatarynda QR Sý resýrstary jáne ırrıgasııa mınıstri Nurjan Nurjigitov, QR Parlamenti Májilisiniń depýtaty Aıdarbek Qojanazarov jáne Qazaq Debate qozǵalysynyń negizin qalaýshy Erbolat Muhamedjan boldy.
«Azamat» jobasy – ulttyq pikirsaıys mádenıetin jańasha formatta damytýdy maqsat etken biregeı platforma. Joba QR Parlamenti Májilisiniń, Mádenıet jáne aqparat mınıstrliginiń jáne Ǵylym jáne joǵary bilim mınıstrliginiń resmı qoldaýymen júzege asyrylýda.