Ulttyq banktiń sarapshylary arasynda júrgizgen makroekonomıkalyq saýalnamasynyń nátıjeleri Qazaqstan ekonomıkasyna qatysty birqatar mańyzdy boljamdardy usyndy. Sarapshylar ekonomıkalyq ósimniń baıaýlaýy jáne ınflıasııanyń joǵarylaýy múmkin ekendigine alańdaýly, dep habarlaıdy Egemen.kz.
Munaı baǵasy jáne ekonomıka ósýi
2025 jáne 2026 jyldar úshin Brent markaly munaı baǵasynyń boljamy 1 barrel úshin 75 dollar jáne 72 dollar deńgeıinde saqtalýda. 2027 jylǵa arnalǵan baǵalaý sál joǵarylap, 72,5 dollardy quraýy múmkin.
Qazaqstan ekonomıkasynyń ósimine qatysty boljamdar tómendegen. 2025 jylǵa arnalǵan ósim boljamy 4,9%-dan 4,7%-ǵa, 2027 jylǵa boljam 4,5%-dan 4,3%-ǵa deıin tómendedi. 2026 jyly ósim 4,5% deńgeıinde saqtalyp tur.
Inflıasııa men bazalyq mólsherleme
Inflıasııa boıynsha boljamdar barlyq boljamdyq kezeńde nasharlady. 2025 jylǵa arnalǵan medıanalyq ınflıasııa boljamy 8,7%-dan 10,6%-ǵa deıin kóterildi. 2026 jylǵa ınflıasııa 9%-ǵa deıin ósýi múmkin, al 2027 jylǵa qatysty boljam 6,1%-dy quraıdy.
Inflıasııanyń joǵary deńgeıde bolýyna baılanysty sarapshylar bazalyq mólsherleme de joǵary bolady deıdi. 2025 jyldyń sońyna arnalǵan bazalyq mólsherlemeniń medıanalyq boljamy 15,9%, 2026 jyly 14,3%, al 2027 jyly 11,5% bolyp otyr.