QR Bas prokýratýrasy Qazaqstan azamatyn asa iri kólemde alaıaqtyq jasaǵany úshin qylmystyq jaýaptylyqqa tartý maqsatynda Qyrǵyz Respýblıkasynan ekstradısııalady, dep habarlaıdy Egemen.kz.
Kúdikti áıel 2023 jyldyń maýsymynda adamdar tobynyń aldyn ala sóz baılasýy boıynsha Almaty qalasyndaǵy bankterdiń birine klıentterdiń atynan olardyń banktik shottaryna tirkelgen abonenttik nómirlerin ózgertý týraly habarlamalar jiberip, osylaısha bank shottaryna qol jetkizgen. Keıin kúdikti qashyqtan qol jetkizý arqyly 5 jábirlenýshiniń shotynan «dropperlerdiń» banktik shottaryna aqsha aýdaryp, olardyń qarajatyn ıemdengen.
«Onyń qylmystyq áreketteriniń saldarynan jábirlenýshilerge 230 mıllıon teńgeden astam shyǵyn keltirilgen. Bıylǵy jyldyń qańtarynda ol Bishkek áýejaıynda ustalyp, Qazaqstan Respýblıkasy Bas prokýratýrasynyń suraýy boıynsha otanyna ekstradısııalandy. Qazir kúdikti ýaqytsha ustaý ızolıatoryna qamaldy», dep habarlady Bas prokýratýranyń baspasóz qyzmeti.
Atalǵan tulǵaǵa aıyptalǵan qylmysty jasaǵany úshin múlki tárkilenip, bes jyldan on jylǵa deıingi merzimge bas bostandyǵynan aıyrý jazasy qarastyrylǵan.