8 sáýir kúni Kókshetaý qalasynda «Ulttyq quryltaı sheshimderiniń júzege asýy: qoǵamdyq qatysý jáne baqylaý» taqyrybynda KISI GPS: Gylym. Pikir. Sayasat ulttyq saraptamalyq alańynyń otyrysy ótti, dep habarlaıdy Egemen.kz.
Is-shara barysynda Ulttyq quryltaı sheshimderin júzege asyrý joldary talqylandy. Azamattyq qoǵamnyń qoǵamdyq qatysý men baqylaýdaǵy róline, sondaı-aq memleket pen halyq arasyndaǵy ózara is-qımyl tetikterine erekshe nazar aýdaryldy.
Talqylaýǵa memlekettik organdardyń, saraptamalyq ortalyqtardyń, úkimettik emes uıymdardyń ókilderi, sondaı-aq bilim berý, azamattyq qoǵam jáne ózge de salalardaǵy sarapshylar qatysty.
Otyrysqa qatysýshylarǵa onlaın formatta Qazaqstan Respýblıkasynyń Prezıdenti janyndaǵy Qazaqstannyń strategııalyq zertteýler ınstıtýtynyń dırektory Erkin Tuqymov sóz sóıledi. QSZI basshysy Ulttyq quryltaıdyń IV otyrysynyń Býrabaıda ótýi óńirlerdiń eldiń ornyqty damýyndaǵy mańyzdy rólin kórsetetinin aıtyp, Prezıdenttiń: «Kúshti óńirler – qýatty el» degen sózderin eske saldy.
E. Tuqymov ótken aptada Ulttyq quryltaı bastamalaryn júzege asyrý jospary bekitilgenin atap ótti.
«Bul – júıeli ózgeristerge baǵyttalǵan naqty qadam. Alaıda onyń tıimdiligi qoǵamnyń belsendi qatysýyna tikeleı baılanysty. Azamattardyń sheshim qabyldaýǵa qatysýy ǵana emes, olardy júzege asyrý boıynsha qoǵamdyq baqylaý men monıtorıng tetikterin damytý da mańyzdy. Búgin biz osy máselelerdi ashyq, kásibı ári syndarly túrde talqylaý úshin jınalyp otyrmyz. Jergilikti deńgeıde halyqtyń qatysýyn qalaı kúsheıtýge bolady? Qoldanystaǵy keri baılanys pen baqylaý quraldarynda qandaı kedergiler bar? Azamattyq áleýet aımaq pen búkil eldiń ıgiligine qalaı jumys isteı alady?», dedi QSZI dırektory.
QR Prezıdenti janyndaǵy QSZI dırektorynyń orynbasary Nurlan Saqýov óz sózinde óńirlerdi ortalyqsyzdandyrý jáne olardyń bıýdjettik derbestigin arttyrý sońǵy jyldardaǵy óńirlik memlekettik saıasattyń basty baǵyttarynyń biri bolǵanyn atap ótti.
Ol sondaı-aq Býrabaıda ótken Ulttyq quryltaı otyrysynda Memleket basshysy ár óńir úshin ósý núktelerin aıqyndaıtyn О́ńirlik saıasat tujyrymdamasyn ázirleýdi tapsyrǵanyn eske saldy. Atap aıtqanda, Aqmola óńiri mektepterdiń jetkiliksizdigi, jol sapasynyń tómendigi jáne jelilerdiń tozýy sııaqty máselelerdi sheshýi qajet.
«Tujyrymdamada salyqtardyń bir bóligin jergilikti deńgeıge berý arqyly óńirlerdiń ekonomıkalyq jáne bıýdjettik derbestigin odan ári arttyrý qarastyrylǵan», dedi QSZI dırektorynyń orynbasary.
Qoǵamdyq baqylaý ınstıtýttaryn kúsheıtý qajettigine toqtalǵan N. Saqýov máslıhattardyń jergilikti bıýdjetterdi talqylaý men bekitý úderisindegi mańyzdy rólin atap ótti.
«Meniń oıymsha, máslıhattardyń apparattaryn kúsheıtip, olardy saraptamalyq resýrstarmen qamtamasyz etý, ásirese bıýdjet qabyldaý úderisindegi ashyqtyqty arttyrý qajet. Memleket basshysy usynǵan: «yqpaldy Parlament – esep beretin Úkimet» formýlasyn óńirlik deńgeıde de qoldanýǵa bolady. Bul atqarýshy organdardyń jergilikti ókildi organdarǵa esep berýin qamtamasyz etedi», dedi N. Saqýov.
«AMANAT» partııasynyń Aqmola oblystyq fılıalynyń atqarýshy hatshysynyń orynbasary Aqmanat Álimbetova óńirdegi qoǵamdyq monıtorıngtegi partııa úlesi týraly aıtyp berdi.
«Qoǵamdyq baqylaý beketteri aıqyndalǵan. Oblystyq fılıalda sybaılas jemqorlyqqa qarsy is-qımyl jónindegi qoǵamdyq keńes jumys isteıdi, onyń músheleri de monıtorıng júrgizedi. Áleýmettik jelilerde halyq ózekti máselelerdi kótergende, partııa belsendileriniń, sarapshylardyń, ÚEU ókilderiniń qatysýymen jedel áreket etý tájirıbesi qalyptasty», dedi A. Álimbetova.
«Aqmola oblysynyń Azamattyq alıansy» zańdy tulǵalar birlestiginiń tóraǵasy Irına Terenteva qoǵamdyq baqylaýdy kásibılendirý qajettigin atap ótti.
«Halyq únine qulaq asatyn memleket» qaǵıdatyn júzege asyrý úshin qoǵamdyq belsendilerge tıisti bilim men quzyretter qajet: memlekettik organdarǵa qalaı hat joldaý kerek, neni eskerý qajet, qoǵamdyq baqylaý degen ne, ártúrli ÚEU-nyń ókilettikteri qandaı? Memleket pen úkimettik emes sektor arasynda ózara qozǵalys bolýy tıis. Ýaqyt óte kele bul azamattyq sektordyń damýyna yqpal etedi. Sonda ǵana qoǵamdyq baqylaýdyń kásibılenýi týraly aıta alamyz», dedi I. Terenteva.
Aqmola oblystyq ardagerler keńesi tóraǵasynyń orynbasary Shııap Alıevjastardyń áleýetin el damýyna jumyldyrý qajet ekenin aıtyp, Jumysshy mamandyqtar jyly jarııalanǵanyn quptady.
Aqmola oblysynyń kásipkerler quqyǵyn qorǵaý jáne sybaılas jemqorlyqqa qarsy is qımyl keńesiniń tóraıymy Valentına Gerashenkosalyq reformasyn talqylaýǵa kásipkerlerdi tartý mańyzdy ekenin aıtty.
«Búginde biz kásipkerlerdiń keń aýqymyn Palata janyndaǵy jeti salalyq keńestiń jumysyna tartýǵa múddelimiz. Keńester jańa ekonomıkalyq saıasat pen salyq reformasyn talqylaý alańyna aınalyp otyr. Bul bıznes qaýymdastyǵyna memlekettik organdarmen ózara tıimdi árekettesýge múmkindik beredi. Keńester jumysyna oblys ákiminiń orynbasarlary, aýdan ákimderi men orynbasarlary, oblystyq basqarma basshylary, sot pen prokýratýra ókilderi, Antıkorrýpsııalyq qyzmet pen depýtattar qatysady», dep naqtylady V. Gerashenko.
Aqmola oblysy Sıfrlandyrý jáne arhıvter basqarmasynyń «Smart Aqmola» bóliminiń basshysy Gúlim Begalına óz sózinde sıfrlyq saýattylyq pen qaýipsizdik máselelerine toqtalyp, olardyń azamattyq bastamalar men qoǵamdyq baqylaýdyń damýyna áser etetinin aıtty.
Talqylaýdy qorytyndylaı kele, QSZI dırektorynyń orynbasary, alań moderatory Alýa Joldybalına qoǵamdyq monıtorıng pen baqylaý jobalardyń sapaly oryndalýyn, bastapqy josparǵa sáıkestigin jáne bıýdjettik qarajattyń tıimdi jumsalýyn baǵalaýǵa múmkindik beretinin atap ótti. KISI GPS alańynyń qatysýshylary bul úderis memleket bastamalaryn baqylaýdy kúsheıtýge, problemalardy anyqtaýǵa jáne sheshý joldaryn usynýǵa múmkindik beretinin aıtty.