Ońtústik Koreıada Azııa elderindegi qazaqtardyń ekinshi quryltaıy ótti. Bul joly Ionın qalasynda Malaızııa, Japonııa jáne Mońǵolııadaǵy qazaq dıasporalarynyń ókilderi bas qosty. Jıynǵa qatysýshylar mádenı jáne ekonomıkalyq yntymaqtastyq jóninde pikir almasty.
Is-shara Seýldegi «Qazaq Nomad Korea» uıymynyń bastamasymen, Qazaqstannyń Koreıa Respýblıkasyndaǵy Elshiligi jáne «Otandastar qory» KeAQ-nyń qoldaýymen 5-6 sáýir kúnderi uıymdastyryldy. Sondaı-aq demeýshiler qatarynda Hankuk shet tilderi ýnıversıteti (HUFS), «Air Astana» áýe kompanııasy, «Pana» qonaqúıler jelisi men «ELSYM8» kompanııasy bar.
Quryltaıdyń alǵashqy kúni mádenıet salasy ókilderiniń qatysýymen mádenı blok jáne Qazaqstan jáne Koreıa kásipkeriniń qatysýymen ekonomıkalyq blokten turatyn eki plenarly otyrys ótti. Onda Azııa elderindegi qazaq mádenı ortalyqtarynyń qazirgi jaǵdaıy men bolashaq josparlary, mádenı-rýhanı baılanystardy nyǵaıtý, sondaı-aq sheteldegi otandastarmen bilim, ǵylym jáne kásipkerlik salalarynda seriktestik ornatý sekildi mańyzdy máseleler talqylandy.
Jıynǵa «Otandastar» qory qazaq tilindegi kitaptardy alyp bardy. Sýretshi ári zerger Aqmaral Baqytova óz jumystaryn kórsetti. Qazaqstannyń eńbek sińirgen qaıratkeri Svetlana Aıtbaeva qatysýshylardy qazaq ónerimen tanystyrdy. Al etnograf Aıgerim Musaǵajınova qazaqtyń ulttyq taǵamdarynyń paıdaly qasıetteri týraly aıtyp berdi. Qazaqstannyń eńbek sińirgen qaıratkeri Jubanysh Jeksenuly kórermendermen birge tanymal qazaq ánderin shyrqady. Quryltaıdyń Hangýk shetel tilderi ýnıversıtetinde ótýi kezdeısoq emes.
– Azııanyń ár túkpirinen kelgen delegattardyń Koreıadaǵy basqosýy sheteldegi qazaqy qundylyqtardyń jańǵyryp, jyraqta júrse de, týǵan elmen baılanysyn úzbeıtin otandastarymyzben aradaǵy yntymaqtastyqty nyǵaıtatyn mańyzdy qadam ekeni sózsiz. Bıyl Býrabaıda ótken Ulttyq quryltaıdyń IV otyrysynda Memleket basshysy Qasym-Jomart Toqaev Abaı ınstıtýty negizgi seriktes elderdiń bárinde tól mádenıetimizdi nasıhattaıtyn ortalyq bolýǵa tıis degen edi. Osy tapsyrma negizinde atalǵan joǵary oqý ornynda Abaı ınstıtýtyn ashýdy kózdep otyrmyz. Ázirge kelissózder júrgizilip jatyr. Bul ortalyq osy bizdiń dıasporalar men basqa da sheteldikterge qazaq tilin úıretý quraly retinde jumys isteıtin bolady, – dedi «Otandastar qory» KeAQ prezıdenti Danııar Qadyrov.
Festıval aıasynda Ońtústik Koreıada alǵash ret qazaq tilinde sheshendik óner saıysy ótti. Ony Qazaqstannyń Seýldegi elshiligi uıymdastyrdy. Fınalǵa Hangýk ýnıversıtetiniń jeti stýdenti shyqty. Olardyń qabiletin Mádenıet qaıratkeri, ánshi Qanat Aıtbaev bastaǵan qazylar alqasy baǵalady. Birinshi oryn ekinshi kýrs stýdenti Lı So Ionǵa buıyrdy.
– Mádenıet jaı ǵana ǵımarattar, mekemeler emes. Bul tutas ulttyq sana-sezimin jahandyq deńgeıde nyǵaıta túsetin myqty tuǵyr. Sondyqtan mádenı baılanysymyz berik bolýy úshin qazaq tilin úırenip, eki el arasyndaǵy qarym-qatynasty odan ári arttyrýǵa yqpaldasqym keledi, – dedi stýdent.
Qazaq tili baıqaýynyń jeńimpazy Seýl-Almaty-Seýl baǵytyndaǵy tegin áýe bıletin ıelendi. Uıymdastyrýshylar bul syılyq Lı So Ionǵa Qazaqstanǵa baryp, tilin odan ári jetildirýge múmkindik beredi degen oıda.
– Hangýk ýnıversıtetinde Ortalyq Azııa elderiniń taný fakýlteti bar eken. Sol jerde qazaq-ózbek tilin úırenetin jastardyń bizdiń mádenıetimizdi, tilimizdi erkin meńgerip úırenip jatqanyn kórip kóńilimiz biraz kóterilip qaldy. Kelbetterinen emes, tiline qarap qana koreı ne qazaq jastary ekenin aıyryp turmyz, – dedi ánshi Qanat Aıtbaev.
Al ekinshi kúni qazaq ortalyqtarynyń ókilderi men otandastarymyzdyń qatysýymen Naýryz merekesin atap ótý, ulttyq oıyndar festıvali jáne óner juldyzdarynyń qatysýymen merekelik konsert uıymdastyryldy.