Astanadaǵy «Stadler Qazaqstan» JShS zaýytynda temirjol kóligin jańǵyrtý baǵdarlamasy aıasynda jolaýshylar vagondarynyń serııalyq óndirisi bastaldy, dep habarlaıdy Egemen.kz.
Bul joba «Jolaýshylar tasymaly» aksıonerlik qoǵamymen jasalǵan kelisimshart negizinde júzege asyrylyp jatyr. Kelisimge sáıkes, 2030 jylǵa deıin jalpy sany 557 vagon shyǵarylady. Onyń ishinde kýpe, plaskart, múmkindigi shekteýli jandarǵa arnalǵan arnaıy vagondar men generatorlyq vagondar bar.
Qazirgi ýaqytta zaýytta 400-den astam qyzmetker jumys isteıdi jáne tolyq óndiristik sıkl jolǵa qoıylǵan. Atap aıtqanda, munda:
Vagon korpýstaryn dánekerleý jáne syrlaý;
Elektr jabdyqtaryn qurastyrý;
Arbashyqtardy jasaý jáne ornatý;
Ishki jabdyqtardy ornatý;
Vagondardy paıdalanýǵa bermes buryn statıkalyq jáne dınamıkalyq synaqtar júrgiziledi.
Sońǵy eki jylda zaýyt aýqymdy jańǵyrtýdan ótip, zamanaýı tehnologııalar engizildi. Bul jergilikti mamandardy oqytyp, óndiristiń joǵary deńgeıde otandyq bolýyn qamtamasyz etýge múmkindik berdi.
Aıta keteıik, Stadler kompanııasynyń vagondary — 40 uıyqtaıtyn orynmen jabdyqtalǵan jaıly kýpelik vagondar. Olar zamanaýı kondısıoner júıesimen, beınebaqylaýmen, elektrlik jylytý qurylǵysymen jáne avtomatty órt sóndirý júıesimen jabdyqtalady. Ár kýpede jolaýshylarǵa arnalǵan elektr rozetkalary men USB-uıashyqtar ornatylady.
Jańa vagondardyń mańyzdy ereksheligi — olardyń syrtqy dızaıny Qazaqstannyń memlekettik týynyń tústerimen — kógildir, sary jáne aq reńdermen bezendiriletin bolady. Bul ulttyq bolmys pen elimizdiń rámizderin aıshyqtaıdy. Sonymen qatar, vagondar Qazaqstannyń klımattyq jaǵdaıy men qalalar arasyndaǵy uzaq qashyqtyqtarǵa beıimdelip jasalady.
Kelisimshart sharttaryna sáıkes, bıylǵy jyldyń ózinde alǵashqy 51 vagon «Jolaýshylar tasymaly» AQ-ǵa tapsyrylmaq. Budan bólek, zaýyt shyǵarylǵan vagondarǵa 20 jyl boıy tehnıkalyq qyzmet kórsetedi. Bul olardyń úzdiksiz jumys isteýin jáne uzaq qyzmet etýin qamtamasyz etedi.