Telefonǵa telmirgen jas býyndy kitap oqýǵa baýlý tabandylyqty, zamanǵa ilese biletin tapqyrlyqty talap etedi. Osy údeden shyǵa bilgen jas muǵalim ádebı týyndylardy komıks arqyly oqytady. Ol oqýlyqtaǵy shyǵarmalardy jasandy ıntellektiniń kómegimen balalarǵa qyzyq janrǵa aınaldyrǵan. Jańa ádisti engizgeli oqýshylardyń pánge burynǵydan kóbirek qyzyǵatyny baıqalypty.
Qostanaı qalasyndaǵy №17 mekteptiń qazaq tili men ádebıeti pániniń muǵalimi Aqbota Ermaǵanbetova 5-9 synyptarǵa sabaq beredi. Onyń engizgen erekshe ádisi boıynsha oqýshylar kórkem shyǵarma keıipkerlerin sýret arqyly ońaı tanı alady. Avtor shyǵarma tilin bala jeńil túsinetindeı etip óńdep, shaǵyn mátinmen tolyqtyrǵan. Jas pedagogtiń komıske aınaldyrǵan týyndylarynyń qatarynda Mirjaqyp Dýlatulynyń «Baqytsyz Jamal», Beıimbet Maılınniń «Shuǵanyń belgisi», Tynymbaı Nurmaǵanbetovtiń «Anasyn saǵynǵan bala» jáne Qorqyt Ata, Tólen Ábdik pen Asqar Altaı eńbekteri bar. Muǵalim barlyq avtorlyq quqyqty Egov.kz portaly arqyly tirkepti.
«Bul ádis mátinderdi oqýshylardyń jas erekshelikterine qaraı beıimdep, sóılemderdi qysqartyp, materıaldy ońaı ári túsinikti qabyldaýǵa múmkindik jasaıdy. Osy rette men úshin komıkster – qyzyq format qana emes, bilim alýshylardyń nazaryn aýdaryp, sıýjetterdi jaqsy este saqtaýǵa kómektesetin qural», deıdi A.Ermaǵanbetova.
Jas ta bolsa, keıipkerimiz qazirdiń ózinde Qazaqstanda, Reseıde jáne Japonııada jarııalanǵan 30-dan asa ǵylymı maqala men 5 ádistemelik quraldyń avtory atanyp úlgergen eken. Izdenimpaz ustazdyń aldyn kórgen, tamyry tereńde jatqan ult rýhanııatynyń qazynalarynan nár alǵan oqýshylary da – oblystyq, respýblıkalyq baıqaýlardyń júldegerleri.