AQSh prezıdenti Donald Tramp Qytaıdan keletin taýarlarǵa salynatyn kedendik baj salyǵyn 125%-ǵa deıin arttyrǵanyn málimdedi. Bul sheshim Qytaıdyń AQSh ónimderine salatyn saýda salyǵyn 84%-ǵa deıin kótergenine jaýap retinde qabyldanǵan, dep habarlaıdy Egemen.kz.
Atalǵan málimdeme Tramptyń jeke TruthSocial áleýmettik jelisinde jarııalandy.
«Qytaı álemdik naryq erejelerin elemeıtindikten, men Qytaıdan ımporttalatyn ónimderge qatysty tarıfterdi 125%-ǵa deıin arttyrý týraly sheshim qabyldadym. Bul sheshim dereý kúshine enedi», dep jazdy Tramp.
Onyń aıtýynsha, Qytaıǵa «AQSh pen basqa memleketterdiń esebinen paıda kórýge bolmaıtynyn» túsinetin ýaqyt jetti.
Budan bir kún buryn Tramp qytaılyq taýarlarǵa kedendik alymdardy 104%-ǵa deıin ulǵaıtqan bolatyn. Buǵan jaýap retinde Qytaı bıligi AQSh-tan ákelinetin ónimderge salynatyn salyqty 84%-ǵa deıin kótergen edi.
Osy jaǵdaıdan soń Beıjiń Dúnıejúzilik saýda uıymyna shaǵymdanýǵa sheshim qabyldady.
Birqatar memleket Aq úımen tarıf máselesin kelisý joldaryn izdestirip jatsa, Qytaı AQSh-qa qarsy sharalar qoldanyp, jaýap retinde óz tarıfterin engizip otyr. Bul áreketter álemdegi eń iri eki ekonomıkanyń arasyndaǵy saýda qaqtyǵysyn odan ári ýshyǵýǵa ákeldi.