Almaty oblysynda halyq kópten kútken ózekti másele – saıajaı alqaptarynyń quqyqtyq mártebesin anyqtaý men olardy eldi mekender quramyna engizý jumystary júıeli túrde qolǵa alynýda. Bul baǵytta oblys ákimdiginiń bastamasymen aýqymdy jobalar iske asyrylyp keledi, dep habarlaıdy Egemen.kz.
Almaty oblysynyń Arhıtektýra jáne qala qurylysy basqarmasynyń málimetinshe, búgingi tańda óńirde jalpy sany 677 saıajaı massıvi tirkelgen.
Saıajaı alqaptarynyń eń kóbi Qarasaı aýdanynda – 203, Talǵar aýdanynda – 151, Eńbekshiqazaq aýdanynda – 135, Ile aýdanynda – 118, Jambyl aýdanynda – 21, Qonaev qalasynda – 9 jáne jańadan qurylǵan Alataý qalasynda – 40.
Oblys ákimdiginiń tapsyrmasyna sáıkes, 2023 jyly Almaty oblysy boıynsha 367 saıajaı massıvin eldi mekenderge qosý úshin qala qurylysy qujattamasy ázirlenip, bekitildi. Bul – óńir tarıhyndaǵy saıajaı máselesin keshendi túrde sheshýge arnalǵan alǵashqy ári mańyzdy qadamdardyń biri.
Sonyń nátıjesinde Ile aýdanynda 88 saıajaı massıvi 8 aýyldyń quramyna engizildi. Atap aıtqanda, KazSIK, Kókqaınar, Japek batyr, Kosózen, Baıserke, Qoıanqus, Komsomol, Janatalap aýyldaryna tıesili saıajaılar endi zańdy túrde eldi mekender shekarasyna kirdi. Bul ózgeristerdiń barlyǵy Ile aýdandyq máslıhatynyń 2023 jylǵy 29 jeltoqsandaǵy sheshimderimen bekitildi.
Sondaı-aq Qarasaı aýdanynda 6 eldi mekenniń aýmaǵyna 102 saıajaı massıvi engizildi. Onyń ishinde Qaskeleń qalasyna – 44, Qyrǵaýyldy aýylyna – 21, Almalybaq aýylyna – 26, Qoshmambet, Eltaı jáne Dolan aýyldaryna – 11 saıajaı massıvi qosyldy.
Bas josparlar 2024 jyldyń aqpan aıynda aýdandyq máslıhat sheshimderimen bekitildi.
Talǵar aýdanynda 6 eldi meken boıynsha 93 saıajaı massıvi eldi meken quramyna engizildi. Bul aýyldardyń qatarynda Kendala, Aqtas, Besaǵash, Tuzdybastaý, Baıbulaq jáne Qyzyltý bar. Barlyq josparlar 2024 jyldyń 26 qańtarynda Talǵar aýdandyq máslıhaty sheshimimen bekitildi.
Eńbekshiqazaq aýdanynda Baıterek aýyly men Esik qalasyna tıesili 35 saıajaı massıvi eldi mekenderdiń shekarasyna engizildi. Qujattar 2023 jyldyń jeltoqsanynda bekitilgen.
Sondaı-aq Qonaev qalasyna – 9, Alataý qalasyna – 40 saıajaı massıvi qosyldy. Qalalardyń bas josparlary QR Úkimetiniń qaýlysymen 2023 jáne 2024 jyldary bekitildi.
Byltyrǵy jyly oblys boıynsha 51 eldi mekenge qatysty jańa qala qurylysy qujattamasy ázirlenip, memlekettik saraptamadan ótýde. Nátıjesinde, shamamen 15 383 jer telimi eldi mekenderdiń shekarasyna resmı túrde engizilmek. Onyń ishinde Ile aýdanynda – 30 saıajaı massıvi, Talǵar aýdanynda – 19, Qarasaı aýdanynda – 27.
2025 jyly Qarasaı aýdanynyń Turar, Kóldi, Bekbolat, jáne Eńbekshiqazaq aýdanyndaǵy Azat aýyldaryna qatysty 23 saıajaı massıvin zańdastyrý boıynsha qujattar daıyndalyp jatyr. Bul jerlerdiń jalpy aýdany – 123,04 gektar.
Qazirgi ýaqytta jergilikti atqarýshy organdar Qazaqstan Respýblıkasynyń Jer kodeksiniń 108-babynyń 1-tarmaǵyna sáıkes, bekitilgen bas josparlar negizinde eldi mekenderdiń shekaralaryn naqtylaý jumystaryn júrgizýde.
Sonymen qatar, Almaty oblysy ákiminiń 2024 jylǵy 19 naýryzdaǵy №18-О́N/Q ókimimen, saıajaı massıvteri boıynsha ózekti máselelerdi anyqtap, sheshý joldaryn ázirleý úshin arnaıy jumys toby qurylǵan. Bul toptyń jumysy kezeń-kezeńimen júzege asyp, turǵyndardyń kóp jyldan beri kóterip júrgen máselelerine naqty jaýaptar berilýde.
Almaty oblysy