«Teńizden tereń ǵylym» degen taqyrypta júrilgen ǵylymı is-shara aıasynda Shakarim University-de jańa ǵylymı zerthana ashyldy. Ǵalymdardyń aıtýynsha, bul – elimizdegi ǵylymnyń jańa sapalyq deńgeıge kóterilýi, dep jazady Egemen.kz.
Búginde ǵylym jabyq, tek teorııamen shektelmeıdi. Muny Shakarim University dáleldep otyr.
«Ýnıversıtetimizde tamaq ónimderin fızıka-hımııalyq taldaý zerthanasynyń ashylýy – tek ýnıversıtet úshin ǵana emes, búkil óńirlik ǵylymı mektep úshin de tarıhı oqıǵa. Memlekettik qarjylandyrý aıasynda jabdyqtalǵan bul zerthana – ǵylymdy óndiriske aınaldyratyn jańa platforma deýge bolady. Munda magıstranttar, doktoranttar jáne jas ǵalymdar naqty ǵylymı jobalarmen aınalysyp, elimizdiń azyq-túlik ónerkásibine úlken úles qosatyn bolady», dedi tehnıka ǵylymdarynyń doktory, professor Qumarbek Ámirhanov.
Rasynda qazir Shakarim University búgingi jahandyq syn-qaterler jaǵdaıynda azyq-túlik qaýipsizdigi, ónim sapasy, tamaq tehnologııalary men tehnologııalyq táýelsizdik máselelerine den qoıatyn strategııalyq jobany qolǵa aldy.
«Men bul jerde rektor retinde emes, professor Qumarbek Júnisbekulynyń shákirti retinde de kelip turmyn. Kezinde ol kisi maǵan «naǵyz ǵylym – eńbekke qurmet jáne adamǵa janashyrlyq bar jerde ǵana bolady» degen edi. «Bul – bizdiń ǵylymı fılosofııamyz. Bul – biz júrip kele jatqan jol», dep, óz bilimin shákirtiniń boıyna daryta bildi», dedi rektory Dýman Orynbekov.
Zerthanamen birge qurt óndirý tehnologııasyna jáne et ónimderiniń jartylaı fabrıkattaryna arnalǵan oqý-óndiristik seh iske qosyldy. Mamandardyń aıtýynsha, jańa zerthana – bilikti maman daıarlaýda, qoldanbaly tehnologııalar damytýda, ǵylymı óndiristi ósirstetýge, ekonomıkalyq serpiliske úlken septigin tıgizedi.
Zerthananyń ashylý saltanatynda kórnekti ǵalym Elemes Tóleýovtiń shákirti, professor Qumarbek Júnisbekulynyń ǵylymı eńbegi joǵary baǵalandy. Ǵalymnyń shákirtteri búginde PhD doktor, ǵylym kandıdaty atansa, endi biri ár óńirde laýazymdy basshylyqta qyzmet etip júr.
Is-shara aıasynda Saıda Manenova, Aısha Qanatova, Shuǵyla Jaqypbekova, Álibı Muratbek, Artem Iаsnov qatarly jas ǵalymdar óz jobalaryn tanystyrdy. Onda fýnksıonaldy taǵamdar, ósimdik komponentteri negizindegi jartylaı fabrıkattar, 3D-prıntıng, gıdroponıka – munyń bári stýdentterdiń óz qolymen jasalǵan ǵylymı jumystardyń nátıjesi.
Rektor Dýman Rymǵalıulynyń aıtýynsha, ýnıversıtet búginde óńirdiń tirek núktesine aınalǵanyn, al ǵylymı ekojúıeniń qurylýy búkil elge úlgi bolarlyq jańa model.
«Biz ıdeıa – iske, zertteý – óndiriske aınalatyn orta qalyptastyramyz. Shakarim University jańa ǵylymı zerthananyń aýdıtorııasyn keńeıtip, alda el ekonomıkasynyń damýyna at salysa beremiz», dedi rektor.
Sondaı-aq ǵylymı jobalar aıasynda jasalǵan ónimderdiń dámin tatý rásimi de boldy. Qonaqtarǵa qurt, jartylaı fabrıkattar, glıýtensiz nan ónimderi, ınnovasııalyq qospalar usynyldy.
Abaı oblysy