Qazaqstannyń Fransııadaǵy Elshiligi men Shymkent qalasy ákimdiginiń uıymdastyrýymen fransýz elinde Shymkent qalasynyń kúnderi atalyp ótti, dep habarlaıdy Egemen.kz.
Is-sharada Qazaqstannyń Fransııadaǵy Elshisi G.Arystanqulova, Garj-le-Goness qalasy sport máseleleri jónindegi meriniń orynbasary B. Gıýno jáne «AKFT» qazaq dıasporasynyń tóraǵasy R.Gıýnaı quttyqtaý sóz sóılep, jınalǵan jurtqa jyly lebizderin arnady. Byltyr Parıjde ótken jazǵy Olımpıada oıyndarynyń altyn júldegeri, dzıýdo sportynan ataqty balýan Eldos Smetov te merekelik basqosýda kópshilikke óziniń quttyqtaý tilegin joldady.
Sonymen qatar, Shymkent qalasy týrızm basqarmasynyń basshysy B.Ádilhanov salada atqarylǵan jumystar týraly qysqashy aıtyp ótti. Merekelik konsert aıasynda shahardyń «Qagan» etno-ansambli men «Iаssy» bı toby óz ónerlerin kórermenge pash etti. Sondaı-aq, «Mádenıet pen sportty damytý» qoǵamdyq birlestigi ulttyq oıyndar - asyq atý, arqan tartýdan qyzyqty sporttyq saıystar uıymdastyrdy.
Osy is-sharada fýtboldan ótken halyqaralyq týrnır de kópshilikke keremet áser syılady. Aıaqdop jarysyna birneshe komanda qatysty. Olardyń qatarynda qazaqstandyq dıplomattar, qandastar, Fransııada jumys isteıtin, oqıtyn otandastar, sheteldikter boldy. Týrnır nátıjesinde «Parıj qazaq sport» komandasy chempıon atansa, «Ońtústik Qazaqstan oblysy» komandasy kúmis medal jeńip aldy, al «Dostyq» komandasy qola medaldi mise tutty. Barlyq jeńimpazdardy dzıýdodan Olımpıada chempıony E.Smetov óz qolymen marapattady.
Budan bólek Shymkenttiń Fransııadaǵy kúnderi is-sharasyna qatysýshylar «Urshyq» qolónershiler qoǵamy uıymdastyrǵan sheberlik saǵatyna qatysyp, toqylǵan ulttyq áshekeıler men qolóner buıymdarynyń jasalýyn tamashalady. Kóktemgi kezdesý ulttyq kıimniń «Bibikarden» áıelder toptamasynyń kórsetilimine ulasty.
Sonymen uıymdastyrýshylar shymkenttik ónerpazdar syılaǵan qýanysh Qazaqstan men Fransııa arasyndaǵy dostyq pen yntymaqtastyqty nyǵaıtýǵa úlken úles qosqanyn atap ótti.