Prezıdent Kongress-holǵa jınalǵan jergilikti qaýym aldynda sóılegen sózinde shaharǵa jumys saparymen arnaıy kelgenin, shyraıly Shymkent elimiz úshin óte mańyzdy qala, tarıhy tereń qasterli meken ekenin atap ótti, dep habarlaıdy Egemen.kz Aqordanyń baspasóz qyzmetine silteme jasap.
«Halqymyz Shymkentti shyraıly shahar dep ataıdy. Rasynda bul jerdiń aýa raıy da, adamdary da óte keremet, erekshe dep aıtýǵa bolady. Qala turǵyndary óte eńbekqor, taza, isker azamattar. Osy jerde otyrǵan ár azamattyń eńbegi mol. Men barshańyzǵa shyn kóńilimmen rızashylyǵymdy bildiremin. Kóne shahar toǵyz joldyń torabynda tur. Uly Jibek joly kezinde osy aımaqtan ótkeni belgili. Shymkentte erte zamannan beri saýda-sattyq órken jaıdy, túrli mádenıetter men dástúrlerdiń izi qaldy. Bul kerýenniń kóshi áli de úzilgen joq. «Batys Eýropa – Batys Qytaı» kólik dálizi osy qalany basyp ótedi. Kúre joldyń arqasynda shahardyń strategııalyq mańyzy arta tústi. Meniń birer jyl buryn Shymkent halqymen kezdeskenim esterińizde bolar. Sol kezde aıtqan sózimdi taǵy da qaıtalap ótkim keledi: «Bereke degenimiz – ekonomıka, al yntymaq degenimiz – saıasat». Shyn máninde, osy eki qundylyq elimizdi alǵa bastaıdy. Muny Shymkenttiń búgingi kelbetine qarap aıtýǵa da bolady. Shahar jyl ótken saıyn qaryshtap damyp keledi. Kóptegen óndiris oryndary ashylyp jatyr. Meniń tapsyrmammen birneshe áleýmettik nysan salyndy. Atap aıtqanda, Kongress-holl, eki Oqýshylar saraıy, 11 jaıly mektep boı kóterdi. Aıtpaqshy, Shymkenttiń bir top azamaty Kongress-holdy «Tulip Hall» dep atamaı, bul ǵımaratqa «Qyzǵaldaq saraıy» nemese «Qyzǵaldaq» degen ataýdy berý jóninde usynys aıtyp jatyr. Menińshe, oryndy pikir, kelisýge bolady. Olaı bolsa, saraıdyń ataýy «Qyzǵaldaq» bolsyn. «Qyzǵaldaq saraıy» degen sál uzaqtaý eken. Byltyr qalada jalpy aýmaǵy 1,3 mıllıon sharshy metr bolatyn turǵyn úı salyndy. Metallýrgııa, qurylys salasy, azyq-túlik óndirisi qarqyndy damyp jatyr. Byltyr qala ekonomıkasy 11 paıyzǵa ósti. Shymkentte 300-den astam ınvestısııalyq joba júzege asyrylýda. Sonyń nátıjesinde 9 myń turaqty jumys orny ashyldy. Tek byltyrdyń ózinde qalaǵa 770 mıllıard teńgege jýyq ınvestısııa tartylǵan», dedi Memleket basshysy.
Prezıdent halyq arasynda Shymkentti «kásipkerlerdiń otany» dep ataıtynyna nazar aýdaryp, qala ekonomıkasynyń jartysynan kóbi 140 myńǵa jýyq shaǵyn jáne orta bıznes nysanynyń enshisinde ekenin jetkizdi.
«Megapolıstiń demografııalyq ósimi de joǵary. Tabıǵı ósimmen birge, munda kóship kelip jatqandar kóp. Osynyń ózi qalanyń tirshilikke qolaıly, bolashaǵy zor ekenin kórsetedi. Biraq baqylaýsyz kóshi-qon, ıaǵnı, mıgrasııa tıisti tehnıkalyq jáne áleýmettik ınfraqurylymǵa áser etedi. Muny da umytpaýymyz kerek. Árıne, Shymkent men jańa aıtyp ótken tabystyń bárine, eń aldymen, eńbekqor, isker ári uıymshyl halqynyń arqasynda jetip otyr. Qazirgi almaǵaıyp zamanda bul qasıetter ár azamattyń boıynan tabylýy kerek dep sanaımyn», dedi Memleket basshysy.