Ekinshi dúnıejúzilik soǵysta qazaq halqy asqan batyrlyǵymen, óshpes erligimen tanyldy. Jyl ótken saıyn jeńis alaýgerleriniń erligi jadymyzda jańǵyryp otyr.
Jeńistiń 80 jyldyǵyna oraı Astanadaǵy Qarýly kúshterdiń áskerı-tarıhı mýzeıinde «Uly Jeńis: Erlikke – taǵzym, urpaqqa – úlgi» atty halyqaralyq sýret kórmesi ashyldy. Kórmege Qazaqstan, Qyrǵyzstan, Reseı elderiniń maıtalman sýretshileriniń 100-ge jýyq týyndysy qoıylǵan.
Olardyń ishinde surapyl sum soǵysty beınelegen týyndylar, portrettik jumystar men tarıhı oqıǵalardy sýrettegen kartınalar bar. Qazaqtyń batyr qyzdary Álııa Moldaǵulova, Mánshúk Mámetova, Hıýaz Dospanovanyń portrettik plakattary da kórermen qaýymǵa erekshe áser syılaıdy. Is-sharanyń ashylýyna Májilis depýtattary bastaǵan bir top zııaly qaýym ókilderi qatysty.
– Kórmege qoıylǵan kartınalardy Sýretshiler odaǵy men Sýret akademııasy jınaqtaǵan. Biz mýzeı tarapynan 15 kartına qoıdyq. Negizgi maqsat – batyrlar esimin ulyqtaý, óner arqyly jastarǵa áskerı-patrıottyq tárbıe berý, mýzeı isin damytý. Bul kórme bir aıǵa jýyq ýaqyt turady, kelem deýshilerge esigimiz ashyq, kirý tegin, – dedi Ulttyq áskerı-patrıottyq ortalyǵy Áskerı-tarıhı mýzeıiniń basshysy Dáýlet Qadyrov.
Sonymen qatar kórmege qatysqan sýretshiler men birqatar uıymdastyrýshylar arnaıy sertıfıkattarmen marapattaldy.
– Týyndylarǵa tek urys dalasyndaǵy shaıqas qana emes, oǵan deıingi jáne odan keıingi aýyr jyldar, maıdannan balasyn kútken ana, aýyldaǵy jaǵdaı, tyldaǵy eńbek sııaqty abstraktili taqyryptar arqaý bolǵan. Bul soǵystyń búgingi árbir azamatqa qatysy bar, kóbimizdiń atalarymyz, týystarymyz osy soǵystan oralmaı qaldy, jaraly, múgedek bolyp keldi. Sondyqtan Jeńis mereıtoıy qarsańynda ótkizilip jatqan halyqaralyq deńgeıdegi kórmeniń mán-maǵynasy zor, – deıdi Astana qalasy Sýretshiler odaǵy basqarma tóraǵasy, sýretshi-keskindemeshi О́miráli Ismaılov.
Jıyn barysynda kelgen qonaqtarǵa elordanyń mádenıet salasy qyzmetkerleriniń áskerı-patrıottyq taqyryptaǵy ánderi de tartý etildi.
Jobany uıymdastyrýshylardyń biri, Sýretshiler odaǵynyń basqarma múshesi, keskindemeshi Maqsat Qańtarbaev is-sharanyń mańyzyna toqtaldy.
– Meniń ákem soǵysqa qatysqan. Ákem sekildi barsha maıdannan oralmaǵan batyrlarymyzdy eske alyp, búgin kórme uıymdastyryp otyrmyz. Astanadan bastalǵan kórmeni Almaty, basqa da óńirlerde ótkizý oıda bar. Bizdi qoldaǵan Sýretshiler akademııasynyń prezıdenti Amandos Aqanaevqa alǵys bildiremiz, – dedi Maqsat Qyrǵyzbaıuly.