Malaızııanyń Kýchıng qalasynda ótip jatqan 14 jasqa deıingi jasóspirimder arasyndaǵy álem chempıonatyna Azııa — Tynyq muhıty aımaǵy boıynsha irikteý týrnırinde Qazaqstan quramasy tarıhı jetistikke qol jetkizdi, dep habarlaıdy Egemen.kz.
Jartylaı fınalda Gonkongpen ótken tartysty matchta jas qazaqstandyq tennısshiler jeńiske jetip, alǵash ret týrnırdiń fınalyna joldama aldy.
Alǵashqy kezdesýde Haqnazar Jetkerbaı qarsylasy Kaıl Vandy 6:2, 6:3 esebimen jeńip, komandanyń esep ashýyna úles qosty. Alaıda kelesi oıynda Ahmadı Maqanov Choı Vangqa 0:6, 3:6 esebimen jol berdi.
Bárin sheshken juptyq matchta Maqanov pen Jetkerbaı juby sheber oıyn órnegin kórsetip, Van men Choıdy 7:5, 2:6, 10:3 nátıjesimen tize búktirdi. Osylaısha, Qazaqstan jasóspirimder quramasy óz tarıhynda alǵash ret álem chempıonatynyń irikteý kezeńiniń fınalyna shyqty.
Fınalda Saǵadat Aıap jattyqtyratyn komanda Japonııa quramasymen bas júlde úshin talasady. Sheshýshi match erteń ótedi.