Oral qalasynda memlekettik qyzmet isteri agenttiginiń Batys Qazaqstan oblysy boıynsha departamenti men oblystyq mádenıet, tilderdi damytý jáne arhıv isi basqarmasy qazaq, orys jáne aǵylshyn tilderin meńgergen memlekettik qyzmetshiler arasynda «Til sheberi» oblystyq baıqaýyn uıymdastyrdy, dep jazady Egemen.kz.
Memlekettik qyzmetshiler arasynda qazaq, orys jáne aǵylshyn tilderin jetik meńgergen mamandardy anyqtaý jáne qoldaý maqsatynda ótken baıqaýǵa Batys Qazaqstan oblysynyń aýdandarynan jáne Oral men Aqsaı qalalarynan kelgen qyzmetkerler qatysty.
Olar baıqaýdyń birinshi kezeńinde «Sóztanym» saıysyna túsip, mátindegi kónergen sózdiń maǵynasyn qazaq tilinde aıtyp berdi. Al ekinshi kezeńde «Eltanym» baıqaýyna qatysyp, qazaq jeri jáne onyń aımaqtary, ulttyq qundylyqtary jónindegi suraqtarǵa orys tilinde jaýap qatty. Úshinshi «Oıtanym» kezeńi qatysýshylardyń aǵylshyn tili deńgeıin synady. Olar bul kezeńde uly tulǵalar, ulttyq aspaptar, ulttyq oıyndar jaıly suraqtarǵa aǵylshyn tilinde tolyq ári naqty jaýap berýge tyrysty.
Asa tartysty ótken baıqaýǵa memlekettik qyzmet isteri agenttiginiń Batys Qazaqstan oblysy boıynsha departamenti basshysynyń orynbasary Dáýren Qaıyrov, Mahambet О́temisuly atyndaǵy Batys Qazaqstan ýnıversıteti shet tilderi muǵalimderin daıyndaý bilim berý baǵdarlamasynyń aǵa oqytýshysy Elmıra О́temisova, osy ýnıversıtettiń til men ádebıet muǵalimderin daıyndaý baǵdarlamasynyń aǵa oqytýshylary Raıhan Maqulova men phD Kámshat Jumasheva, oblystyq mádenıet, tilderdi damytý jáne arhıv isi basqarmasynyń bólim basshysy Sveta Ǵanıeva qazylyq etti.
Qazylar alqasynyń sheshimi boıynsha Oral qalasyna qarasty Zachagan kenti ákimdigi abattandyrý bóliminiń bas mamany Dáýletjan Muhanbetqalıev baıqaýdyń birinshi oryn júldegeri atandy. Ekinshi orynǵa Terekti aýdany Uzynkól aýyldyq okrýgi ákimi apparatynyń bas mamany Eleonora Qarabalına ıe boldy. Al júldeli 3-oryn Shyńǵyrlaý ákimi apparatynyń bas mamany Doshan Shotpanovqa buıyrdy.
Baıqaý sońynda barsha til sheberleri dıplommen, alǵys xat jáne baǵaly syılyqtarmen marapattaldy.
Batys Qazaqstan oblysy