Túngi klýb Shymkenttegi «Shahan», «Sultan» sýpermarketiniń burynǵy ǵımaratynyń ornynan paıda bolǵan. Qurylys normasy boıynsha ol jer qaıta dúken bolýy tıis edi. Alaıda qalaı bolǵany belgisiz nysan kóńil kóteretin orynǵa aınalyp ketken, dep jazady Egemen.kz.
Túngi klýb ashylǵaly sol mańnyń turǵyndarynan maza qashqan. Úlkender jastardyń beımezgil júrisine bir alańdasa, dańǵyraǵan mýzykadan da ábden sharshaǵan. Sodan halyqtyń shaǵymy kúsheıip, qalalyq orta sapasy jáne baqylaý basqarmasy arnaıy tekserý júrgizgen. Nátıjesinde dýmandatyp kesh ótkizetin jerdiń zańsyz jumys istep kelgeni anyqtaldy. Sóıtip turǵyndardyń shaǵymy boıynsha arnaıy nusqama berilip, kóńil kóteretin jaıdyń esigine qara qulyp salyndy. Aıta ketý kerek, «ZIMA» túngi klýby Qarataý aýdany, Nursát shaǵyn aýdanyndaǵy Báıdibek bı dańǵyly №36A mekenjaıynda ornalasqan.
Joǵaryda aıtqanymyzdaı, tekserý barysynda bul nysan eski sýpermarkettiń ornynan qaıta jabdyqtalyp, túngi klýbqa ózgergeni belgili boldy. Alaıda atalǵan mekenjaıdaǵy jer ýchaskeleriniń nysanaly maqsaty – áleýmettik-mádenı turmys obektilerin jobalaý men salý bolyp belgilengen edi. Soǵan qaramastan jalpy aýdany 1359 sharshy metrdi quraıtyn, irgetasy beton, qabyrǵalary kirpishten qalanǵan, tóbesi metalmen jabylǵan bir qabatty ǵımarat qaıta jańǵyrtýdan ótip, kópfýnksıonaldy dúken retinde emes, túngi klýb retinde paıdalanylǵan. Munymen qosa, ishki úı-jaılar tolyq ózgertilip, ǵımarattyń bastapqy maqsatyna saı kelmeıtin fýnksıonaldyq ózgeristerge ushyraǵan.
Qysqasy ruqsat berý rásimderin saqtamaı, jobalyq-smetalyq qujattamasyz jáne saraptamadan ótpesten júrgizilgen bul qurylys jumystary tehnıkalyq ta avtorlyq ta qadaǵalaýsyz júzege asqan. Osyǵan baılanysty nysan ıesine qatysty QR Ákimshilik quqyq buzýshylyq týraly kodeksiniń 316-baby jáne 463-babynyń 1-bóligi boıynsha ákimshilik is qozǵalyp, materıaldar Shymkent qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotyna joldandy.
Shymkent