Almaty qalasyndaǵy Nazarbaev zııatkerlik mektebiniń eki komandasy NASA jáne AQSh Ulttyq ǵarysh qoǵamy (National Space Society) uıymdastyrǵan Space Settlement Contest 2025 halyqaralyq baıqaýynda jeńimpaz atandy, dep habarlaıdy Egemen.kz.
Baıqaýǵa álemniń 25 elinen 26 myńnan astam oqýshy qatysty. «YURT» jobasyn usynǵan komandanyń quramynda almatylyq oqýshylar Anastasııa Soı, Iýlııa Kım, Kamıla Ertisqyzy jáne Ilııas Dáýlet bar. Olar birinshi oryndy ıelendi. Komanda Iýpıterdiń orbıtasymen qozǵalyp, onyń Ganımed jáne Kallısto serikterine jaqyndaı alatyn avtonomdy ǵarysh stansııasynyń jobasyn tanystyrdy.Stansııa 30 myńǵa jýyq adam turýǵa arnalǵan, jasandy gravıtasııa júıesimen jáne tolyqtaı derbes tirshilikpen qamtamasyz etý júıesimen jabdyqtalǵan.
Ekinshi oryndy taǵy bir qazaqstandyq komandanyń «Ikarýs» jobasy ıelendi. 45 myń turǵynǵa arnalǵan Ganımedtiń tómengi orbıtasynda ornalasqan ǵarysh stansııasyn qurastyrýshylar - Tabyldy Asan, Temirbýlatov Arman, Inkárbek Sabyrjan, Quzbakova Tomırıs, Japarov Muhıdın,Álisher Baǵdáýlet, Berik Ýálı, Nursultan Aısulý, Taırov Arlan, Baqyt Aslan. Jetekshileri — 12 synyp oqýshysy Ádilet Sandyqbaev.
«Oqýshy kezimde World Space Olympiad jáne QazAstroshift sekildi olımpıadalardy uıymdastyrdym. Sol baıqaýlarda men aerokosmos salasyna shynaıy qyzyǵýshylyq tanytatyn ondaǵan shabytty jasty kezdestirdim. Bul qaýymdastyq áli de keńeıip, Qazaqstannyń ǵarysh salasyndaǵy áleýeti odan ári arta túsetinine senemin. Mektepti bıyl aıaqtap jatqan men bolashaqtan qoryqpaımyn. Kerisinshe, biz endi ǵana bastadyq. Alda jańa belester men úlken jetistikter», deıdi Ádilet Sandyqbaev.
Space Settlement Contest — mektep oqýshylaryna arnalǵan halyqaralyq jyl saıyn ótkiziletin baıqaý. Ol oqýshylardyń ınjenerlik oılaý qabiletin, kreatıvtiligin jáne ǵylymǵa umtylysyn damytýǵa baǵyttalǵan.