Májilis depýtaty Nursultan Baıtilesov shekten tys bıýrokratııadan arylý qajettiligin aıtyp, adamı resýrsty tıimdi paıdalanýǵa shaqyrdy, dep habarlaıdy Egemen.kz.
«Memleket basshysy Qazaqstan halqyna Joldaýynda memlekettik apparatty bıýrokratııadan aryltýdy basty basymdyqtardyń biri retinde atady. Bul – memlekettik organdardyń tıimdiligin arttyrýǵa baǵyttalǵan mańyzdy qadam. Prezıdent artyq qujat aınalymyn qysqartyp, basshylardyń jaýapkershiligin kúsheıtýge shaqyrdy. Osyny iske asyrýǵa arnalǵan zań jobasy usaq ári jıi ózgeristerdi boldyrmas úshin egjeı-tegjeıli normalardy qysqartýǵa baǵyttalǵan. Bul adamı resýrstardy tıimdi paıdalanýǵa jol ashady», deıdi depýtat.
Buǵan qosa ol memlekettik bıýdjetti artyq shyǵyndardan saqtaý kerektigin jetkizdi.
«Zań jobasynda ákimshilik jazalardy oryndaý júıesindegi naqty máseleler de qamtylǵan. Solardyń biri – arnaıy qabyldaý mekemelerinde oryn jetispeýi. Qazir bul mekemelerde júkteme asa joǵary. Al keıbir óńirlerdegi qabyldaý oryndary shalǵaıda ornalasqandyqtan logıstıkalyq qıyndyqtar týyndatýda. Sonymen qatar materıaldyq-tehnıkalyq bazanyń eskirýi sot aktileriniń oryndalýyna kedergi keltirýde. Zań jobasy ákimshilik qamaýǵa alynǵandardy ýaqytsha ustaý úshin qoldanystaǵy qabyldaý-taratý mekemelerin paıdalanýdy usynady. Bul júıege túsetin salmaqty memlekettik bıýdjetten qosymsha shyǵynsyz sheshýdi kózdeıdi», dedi N. Baıtilesov.