El táýelsizdigin alǵaly jastardy jumyspen qamtýdy úılestirý úzdiksiz júrgizilip keledi. Osy maqsatta iske qosylǵan «Joltap» jobasy astanalyqtardyń jańa salalardy meńgerýine jáne tabysyn arttyrýǵa kómektesip júr. Búginde ilkimdi bastamanyń ıgiligin kórgender 9 myńnan asty.
Joba aıasynda eńbekke aralasqandardyń qatarynda Gúlshara Turqaıdarova da bar. Ol qysqa ýaqyt ishinde tiginshilik pen dızaınerlik kýrsyn sátti aıaqtap, sertıfıkat aldy. Izinshe elordadaǵy fabrıkalardyń birine jumysqa ornalasty.
– Bala kezden tigin tigýdi jaqsy kóremin. «Joltap» jobasyn estigen kezde, birden baǵymdy synap kórgim keldi. Astanadaǵy modýldik pýnktke baryp, kýrsqa jazyldym. Kóp uzamaı oqýym da bastaldy. Barlyǵy joǵary deńgeıde uıymdastyrylǵan. Ustazdarymyz – Farıda Arystanqyzy men Anar Tólegenqyzyna erekshe alǵys aıtqym keledi. Olar búge-shúgesine deıin túsindirip, demep, qoldaý kórsetti, – deıdi G.Turqaıdarova.
Baǵdarlamanyń taǵy bir túlegi – Aınash Tileýhanova. Ol birneshe kýrsty aıaqtap, búginde ıgergen daǵdylaryn qonaqtarǵa arnalǵan jıhazdy jalǵa berý bıznesin damytý úshin qoldanyp jatyr.
– Úıde, meıramhanalarda bolatyn otbasylyq toı jáne basqa da merekelik is-sharalarǵa jıhaz, ydys-aıaqtardy jalǵa beremin. Joltap jobasy kómegimen mobılografııa, SMM, vıdeomontaj, grafıkalyq dızaın jáne Kaspi arqyly saýda jasaýdyń negizderin tegin oqydym. Qazir kásibimniń paraqshasyn ózim júrgizemin, neshe túrli kontent jasaımyn. Nátıjesinde tabysymdy eseledim, – deıdi joba qatysýshysy.
Jalpy áleýmettik joba Memleket basshysynyń tapsyrmalaryn oryndaý maqsatynda Astana qalasy ákimdiginiń bastamasy iske asyrylyp jatyr. Buǵan jumyssyz azamattar, tájirıbesi men bilim-biligi joq NEET sanatyndaǵy jastar, aýyl-aımaqtan jańadan kóship kelgen azamattar jáne tabysyn arttyrýǵa múddeli jandar qatysa alady. Olarǵa munda memlekettik qoldaý sharalary jóninen keńes beriledi jáne 17 jumysshy jáne sıfrlyq mamandyq boıynsha qysqa merzimdi oqýdan ótýge múmkindik bar.