30 sáýir – 6 mamyr aralyǵynda Perýdiń astanasy – Lımada aýyr atletıkadan jastar men jasóspirimder arasyndaǵy álem birinshiliginiń jalaýy jelbireıdi. Bul básekede elimizdiń jeti óreni óner kórsetedi.
Jahannyń eń myqty jas ári jalyndy ziltemirshilerin anyqtaıtyn jarysta el namysyn Edige Egemberdi men Erasyl Sáýlebekov qorǵaıdy. Ekeýi de 81 kg salmaq dárejesinde synǵa túsedi. Astanada týyp-ósken Edige jergilikti bapker Aıbek Amanııazovtyń qol astynda jattyǵady. Qazaqtyń asa daryndy ziltemirshisi buǵan deıin jastardyń álemdik dodasynda úsh ret dara shyqty. Sońǵy ret byltyr Ispanııanyń Leon qalasynda 89 kg salmaqta kúsh synasty. Barlyq alty múmkindiginde múlt ketpegen ol basty qarsylastary ırandyq Álıreza Abaspýr men kolýmbııalyq Djokser Albornosty artqa tastap, bas júldeni qanjyǵasyna baılady. Pıreneı túbeginde Egemberdi 352 (153+199) kg salmaqty erkin eńserdi. Sondaı-aq ol qurlyq birinshiliginde de aldyna jan salmady. Eger Edige osy joly da top jaryp jatsa, onda óziniń týǵan kúnine úlken syı jasamaq. О́ıtkeni dál sol jarys aıaqtalatyn kúni E.Egemberdi 20 jasqa tolady.
Erasyl Sáýlebekovtiń de esimi sportsúıer qaýymǵa jaqsy tanys. Byltyr dál sol Ispanııada álem chempıonatynyń qola medalin moınynda jarqyratty. Sonymen qatar Syr boıynyń saıypqyrany 2022 jyly Meksıkada, 2023 jyly Albanııada ótken jasóspirimderdiń dúnıejúzilik dodasynda bas júldeni oljalady. Osy jaıttardyń ózi-aq Lımadaǵy jarysta Erasyldyń da jeńis tuǵyrynyń eń bıik satysyna kóterilýge jaqsy múmkindigi bar ekenin aıǵaqtaıdy.
Jasóspirimderdiń álem birinshiliginde qyzylordalyq Beıbarys Erseıit (61 kg) pen Ernur Myrzahmet (81 kg), Almaty oblysynyń ókili Ksenııa Prozorova (61 kg), aqmolalyq Kıra Danılova (81 kg), almatylyq Mahambet Alpysbaı (102 kg) óner kórsetedi.