Merkidegi janarmaı quıý beketinde sheteldik motosıklshige jasalǵan shabýylǵa qatysty jańa málimetter belgili boldy. Jábirlenýshiniń advokaty qylmystyq istiń babyna ózgeris engizilgenin aıtty, dep habarlaıdy Egemen.kz.
Motosıklshiniń advokaty Zákir Asadovtyń aıtýynsha, onyń qorǵaýshysy táýlik boıy tártip saqshylarynyń qorǵaýynda. Qylmystyq is Merki aýdandyq polısııa bóliminen Jambyl oblysy polısııa departamentiniń tergeý bólimine berildi.
Onyń málimetinshe, is budan da aýyr bap boıynsha qaıta saralanǵan.
«Qylmystyq is 293-baptyń 3-bóliginen «buzaqylyq» 99-baptyń 2-bólimi 9-tarmaqqa 24-bapty qoldana otyryp, ıaǵnı «buzaqylyq nıetpen kisi óltirýge oqtalý» dep qaıta saralandy», dedi Asadov.
Qylmystyq bap boıynsha kinási dáleldense, shabýyldaýshy 15 jyldan 20 jylǵa deıin nemese múlki tárkilenip, ómir boıyna bas bostandyǵynan aıyrylýy múmkin.
Eske salaıyq, qylmys 13 sáýirde boldy. Sol kúni belgisiz bireý Merkidegi janarmaı quıý beketinde sheteldik motosıklshige pyshaqpen shabýyl jasaǵan. Jábirlenýshiniń advokaty QR Ishki ister mınıstri Erjan Sádenovke vıdeoúndeý joldady.
Zakır Asadovtyń aıtýynsha, shabýyl jasady degen kúdiktiniń týystary onyń qorǵaýyndaǵy azamatqa qysym kórsetip, aryzdan bas tartýǵa kóndirip jatyr.