Festıval dúnıejúzilik kreatıv kúni aıasynda elimizde tuńǵysh ret ótip jatyr, dep habarlaıdy Egemen.kz.
Bul festıval — elimizdiń mádenıet, óner jáne bilim salalaryndaǵy túrli ókilderdi biriktirýdi maqsat etken mańyzdy is-shara. Baǵdarlama aıasynda qatysýshylar sheberlik sabaqtaryna, dárister men shyǵarmashylyq sheberhanalarǵa qatysa alady. Sonymen qatar kórermender dızaınerler, sýretshiler, ıllıýstratorlar týyndylarynan quralǵan kórmeler men qolónershilerdiń jármeńkesin tamashalaıdy.
Festıvaldiń negizgi maqsaty — qonaqtar men otandyq kórermenderdi shyǵarmashylyq ındýstrııamen jaqynyraq tanystyrý jáne bul salanyń órkendeýine qoldaý bildirý. Qazirgi tańda kreatıv salasy jahandyq deńgeıde mádenı murany nasıhattap qana qoımaı, jańa jumys oryndarynyń qurylýyna, kásipkerlik belsendiliktiń artýyna jáne ınnovasııalyq bastamalardyń damýyna serpin berip otyr.
Birikken Ulttar Uıymynyń derekterine súıensek, kreatıvti ındýstrııa álemdik jalpy ishki ónimniń shamamen 3,1%-yn quraıdy jáne bul salada jumys isteıtinderdiń 6,2%-yn jastar quraıdy. Sarapshylardyń pikirinshe, 2030 jylǵa qaraı bul kórsetkish 10%-ǵa jetýi múmkin. Qazaqstanda bolsa, 2029 jylǵa deıin kreatıvti ekonomıkanyń úlesi 2%-ǵa deıin ósedi degen boljam bar.
Aıta ketken jón, 2017 jyly BUU Bas Assambleıasy 21 sáýir kúnin Dúnıejúzilik kreatıv pen ınnovasııalar kúni dep belgiledi. Bul data — shyǵarmashylyqtyń túrli saladaǵy mańyzyn atap ótýge arnalǵan erekshe kún.
Festıval uıymdastyrýshylary Qazaqstannyń bul merekege qatysýyn — mádenıet, bilim jáne ınnovasııa salasyndaǵy halyqaralyq áriptestikke baǵyttalǵan mańyzdy qadam dep sanaıdy. 2026 jyly festıval aýqymyn keńeıtip, elimizdiń barlyq óńirin qamtý josparlanyp otyr.