Búgin 92 jasynda qazaqtyń qabyrǵaly qalamgeri Ákim Tarazı pánı jalǵannyń paraǵyn jaýypty.
Ǵajaıyp sáıkestik: dál osy ýaqytta «Tarazy» shoqjuldyzy da Súmbileni sońyna salyp, Úrkerdi janyna alyp, jerge túsip barady. Ol sonaý tań sýyr tamyzdyń ilki dekadasynda dúnıege qaıta keledi. Iаkı jańa dúnıe, jas tólmen, býyndy shóp, bultty kókpen qaıta qaýyshady…
Ákim aǵamyz da eshqashan jerbaýyrlap júrmegen rýhty qalamdoz. Ilki týyndysy «Quıryqty juldyz» (1966) atalǵanmen, qalamgerdiń buıryqty juldyzy uzaq jandy. Ábden tolysqan shaǵynda «Qorqaý juldyzdy» jazǵanmen, Alqaý juldyzy tuńǵıyqqa emes, tym bıikke shyrqady. Onyń rýh qyrany «uıasyn bultqa saldy!» Sol qasıet bárimizge úlgi!
Alyptar shoǵyry azaıyp barady. Bul Jylan jyly jaqsylarymyzdy jutýmen jyljýda. Degenmen ilgeriden úmit kútken jurt edik, túbi qaıyr dep, qaıyryn suraıyq!
Shańyraǵyn sulý sezimderge besik qylyp, terezesin taza oılarǵa esik qylyp, ańyz adamdy bópedeı saıalaǵan, abyz aǵamdy anadaı aıalaǵan Roza hanym Muqanovaǵa kóńilqosymdy bildiremin! Qasterli shańyraqta uıalaǵan baqtyń sáýlesi kóshpegeı, quttyń táýbesi óshpegeı!
Svetqalı NURJAN,
Memlekettik syılyqtyń laýreaty, aqyn