Qazaqstan halqy Assambleıasynyń 30 jyldyq mereıtoıyna arnalǵan saltanatty jıynda Senat depýtaty, QHA Jýrnalıster klýbynyń tóraǵasy Álisher Satvaldıev sóz sóıledi, dep habarlaıdy Egemen.kz.
Parlament pen máslıhattar depýtattary atynan mereıtoımen quttyqtaǵan Álisher Ǵapırjanuly jalpy, ulttyq tutastyq taqyryby qashanda ózekti ekenin atap, ózbek qaýymdastyǵynyń ókili, Memleket basshysy taǵaıyndaǵan senator retinde sóz sóıleý zor baqyt ekenin tilge tıek etti.
«Bul turǵydan Qazaqstan halqy Assambleıasynyń qyzmetin erekshe atap ótýimiz qajet. 30 jyldyq tájirıbe elimizde jalpyhalyqtyq birlikti nyǵaıtýǵa baǵyttalǵan tıimdi zańnamalyq, basqarýshylyq jáne ınstıtýsıonaldy tetikterdiń tolyq ornyqqanyn kórsetti», dedi Á.Satvaldıev.
Depýtattyń aıtýynsha Ata Zańymyz – etnosaralyq qatynastardaǵy úılesimdilikti qamtamasyz etetin naqty ári tolyqqandy normalardy qamtıtyn, ıaǵnı, barsha azamattardyń teńdigin, ulttyq birlik ıdeıasyn bildiretin sımvoldyq tuǵyrymyz.
«2008 jyly qabyldanǵan «Qazaqstan halqy Assambleıasy týraly» Zań – etnosaralyq qarym-qatynasty, kelisim jáne yntymaqtastyqty qamtamasyz etýdiń kepili ekenin dáleldedi. 30 jyl ishinde Assambleıa qyzmetine qatysty Prezıdenttiń 10-nan astam Jarlyǵy jarııalandy. Assambleıa strategııasy, merzimdi tujyrymdamalar jáne birqatar salalyq baǵdarlamalar qabyldandy. Bunyń barlyǵy júıeli jumystyń kórinisi», dedi Á.Ǵapırjanuly.
Senatordyń aıtýynsha 2007 jyly qabyldanǵan saıası ózgeristerden keıin Májiliske 9 assambleıalyq depýtattyń saılanýy bastaldy. Al, jańa kezeńdegi konstıtýsııalyq reforma, Senatqa 5 depýtat taǵaıyndaý arqyly, Qazaqstandaǵy etnıkalyq toptardyń barlyq múddesin tıimdi qarastyrýǵa jol ashyp, Assambleıa ókilderiniń mártebesin arttyrdy.
«Bul – elimizdegi turaqtylyq pen ádilettilik qaǵıdatyn iske asyrýdyń naqty kórinisi. «Kúshti Prezıdent – yqpaldy Parlament – esep beretin Úkimet» formýlasynyń naqty iske asýy. «Assambleıa. Parlament. Máslıhattar» jobasy jáne «Bir el – bir múdde» depýtattyq toby – halyqtyń tynys-tirshiligin zerdeleıtin tıimdi quralǵa aınaldy. Oblystyq máslıhattarda «Birlik», «Yntymaq» syndy depýtattyq toptar quryldy», dedi Senat depýtaty.
Senator óz sózinde bunyń barlyǵy Qazaqstan halqy Assambleıasynyń 30 jyl ishinde qol jetkizgen, eshkim talasa almaıtyn, tarıhı máni zor tól jetistigi ekenin atap ótti.
«Assambleıadan saılanǵan depýtattar retinde bizdiń basty mindetimiz – tek ókil bolý ǵana emes, zańnamalyq deńgeıde teńdik, ádildik pen kelisim qaǵıdattaryn nyǵaıtý», dedi depýtat.
Sóziniń sońyn senator Á.Satvaldıev Qazaqstandaǵy barlyq saıası kúshterge jáne áriptesterine arnaǵan úndeýmen aıaqtady.
«Etnosaralyq qatynastar búginde jahandyq saıasattyń júıeli faktoryna aınaldy. Biz – bundaı úderisterge órkenıetti jaýap berip, «Zań men tártip» qaǵıdatyn berik ustanyp, saıası arandatýlarǵa jol bermeýimiz qajet. Biz – birtutas halyqtyń bólshegimiz. Bizge – senim, mandaty berilgen. Bul senimdi abyroımen aqtaý – bizdiń ar-namysymyz ben saıası jaýapkershiligimizdiń isi. Biz – Assambleıa músheleri úshin qasıetti jerimizde beıbitshilik pen kelisimdi nyǵaıtýdan, Táýelsizdigimiz ben tutastyǵymyzdy qasterleýden asqan mıssııa da, mindet te joq!», dedi QHA Jýrnalıster klýbynyń tóraǵasy Álisher Ǵapırjanuly.