Senator Aıgúl Qapbarova Parlament Senatynyń spıkeri Máýlen Áshimbaevtyń tóraǵalyǵymen ótken palata otyrysynda myńdaǵan qazaqstandyqtardyń osy ýaqytqa deıin memleket moıyndamaǵan jáne Ulttyq jikteýishke engizilmegen jańa sıfrlyq jáne zamanaýı kásipterde jumys istep júrgenine toqtaldy, dep habarlaıdy Egemen.kz.
Senatordyń aıtýynsha bul mamandardy quqyqtyq jáne áleýmettik qorǵaýdan aıyrady, kadrlardy júıeli daıarlaýǵa kedergi keltiredi jáne salyq ashyqtyǵyn tómendetedi.
«Elimizde myńdaǵan adam resmı klassıfıkatorda joq mamandyq ıesi retinde jumys istep júr. Alaıda olardyń kóbi kóleńkeli sektorda jumys isteıdi, kásibi resmı tirkelmegen. Bul – eńbek quqyǵy men áleýmettik kepildikterden aıyrylǵan úlken aýdıtorııa. Búginde «IT mamany», «sıfrlandyrý salasy», «ınternet tehnologııalary» degen keń uǵymdar óz ishinen júzdegen túrli jeke mamandyqtarǵa bólingen. Bul mamandyqtardyń árqaısysy naqty kásibı qyzmet, naqty qural men naqty naryqtyq suranysqa ıe», dep atap ótti Qapbarova.
Senatordyń pikirinshe 1 mıllıonnan astam adam beıresmı túrde jáne olardyń biliktiligin moıyndamaı jumys isteýi erekshe alańdaýshylyq týǵyzady. Bul osyndaı jumysshylardy áleýmettik qorǵaýdy qıyndatady jáne adamı kapıtaldy tıimsiz paıdalanýǵa ákeledi.
«Naryqta turaqty suranysqa ıe sıfrlyq jáne zamanaýı mamandyqtardy Ulttyq kásipter klassıfıkatoryna engizý kerek. Sala sarapshylary men qaýymdastyqtarymen birlesken saraptamalyq top qurý, beıresmı sektorda jumys istep júrgenderdiń daǵdylaryn taný tetikterin damytý kerek. Salyq jáne áleýmettik júıege beıimdelip, NEET sanatyndaǵy jastardy ıntegrasııalaý, olardy óz áleýetin kásibı túrde damytýǵa yntalandyrý kerek. Eńbek naryǵynyń zamanaýı qurylymyn qamtıtyn jańa statıstıkalyq esep quraldary engizilýi tıis», dep atap ótti Qapbarova.