«Pavlodar munaı-hımııa zaýyty» JShS-de bıylǵy 1 mamyrdan bastap munaı óńdeý tarıfi ózgeredi. Jańa tarıf tonnasyna 35 400 teńgeni quraıdy (QQS-ty eseptemegende), dep habarlaıdy Egemen.kz.
Bul sheshim óndiristik prosesterdiń senimdiligi men tıimdiligin, ekologııalyq qaýipsizdigin qamtamasyz etýge baǵyttalǵan negizgi ınvestısııalyq jobalardy qarjylandyrý qajettiligine baılanysty qabyldanyp otyr.
«2025 jyly zaýytta dızel otynyn gıdrotazartý qondyrǵysyn qaıta qurý kózdelgen. Bul ónimniń sapasyn jaqsartýǵa jáne onyń zamanaýı ekologııalyq standarttarǵa sáıkes kelýine múmkindik beredi. Buǵan qosa barynsha turaqty jáne boljamdy óndiristik sıkldy qamtamasyz etetin keńeıtilgen jóndeýaralyq kezeńge kóshý, qaıtalama prosesterdiń júktemesin ulǵaıtý nátıjesinde munaı ónimderi sebetin jaqsartý josparlanǵan. Operasııalyq táýekelderdi tómendetýge jáne ónerkásiptik qaýipsizdik deńgeıin kóterýge yqpal etetin tehnologııalyq prosesterdi basqarý júıeleri avtomattandyrylady. Atalǵan sharalar kásiporynnyń turaqty damýyna jáne óńdeýdiń joǵary deńgeıin saqtaýǵa baǵyttalǵan. Investısııalyq jobalardy iske asyrý jeńil munaı ónimderiniń ónimdiligin 73%-dan 75% -ǵa deıin ulǵaıtýǵa múmkindik beredi», dep málimdedi kásiporynnyń baspasóz qyzmetinen.
Zaýytta qazirgi ýaqytta 1 tonna shıki munaıdy óńdeýdiń quny – 26 500 teńge. Al 1 mamyrdan qoldanystaǵy tarıf shamamen 34%-ǵa ulǵaıady. Sonymen qatar, PMHZ-da aǵymdaǵy jańartý jumystary munaı jetkizýshiler úshin ónim sebeti qunyn 2024 jylmen salystyrǵanda 6%-ǵa ósirýge jol ashyp otyr. Bul óńdeý tarıfiniń ósýin báseńdetpekshi.
Pavlodar oblysy