Tarazdyq oqýshylar oılap tapqan «Úmit» startaby Ortalyq Azııadaǵy jasandy ıntellekt jobalary arasynda jeńimpaz atandy. Bási bıik «AICA Awards» 2025 baıqaýyna bes memleketten 60-tan astam joba qatysqan. Solardyń arasynan sýyrylyp shyǵyp, saıystyń bas báıgesin ıelengen otandyq startaptyń paıdasy ushan-teńiz, dep habarlaıdy Egemen.kz.
Úmit – múmkindigi shekteýli jandarǵa arnalǵan aqyldy qurylǵy. Osy júıeniń arqasynda tolyq sal bolyp qalǵan adam da kitap oqyp, jumys isteı alady, tipti baǵdarlama jazyp, dızaın jasaıdy. Atalǵan qurylǵy til men bastyń qozǵalysy arqyly smartfon men kompıýterdi basqarýǵa, múgedekter arbasyn júrgizýge múmkindik beredi. Eń bastysy – qurylǵy jasandy ıntellektpen jabdyqtalǵan. Iаǵnı ol adamnyń áreketin tek oryndap qana qoımaı, ne istegisi keletinin aldyn ala boljaıdy. Mysaly, paıdalanýshy tikburysh syzǵysy kelse, JI pishindi ózi-aq túzetip beredi, ne bolmasa ekrandaǵy batyrmany dál tabýǵa kómektesedi.
Joba negizin qalaýshylar alǵashqy ıdeıany naqty ómirden alǵan. Olardyń jaqyn týystary arasynda sal aýrýyna shaldyqqandar bolǵan. Komanda músheleri ońaltý ortalyqtarynda zertteý júrgizip, tipti óz qatarlastary arasynda da smartfon qoldanýǵa múmkindik izdep júrgen jastardyń bar ekenin bilgen. «Sol kezde bul – jaı ǵana tehnologııa emes, qoǵamǵa qajet sheshim ekenin uqtyq», deıdi jobanyń negizin qalaýshy Qanat Tájihan.
Qurylǵyny jasaý barysynda komanda sensorlardy basqarý, ýytsyz ári yńǵaıly materıal tabý, shaǵyn ári qýatty mıkrochıp daıyndaý sııaqty kóptegen qıyndyqtarǵa tap bolǵan. Soǵan qaramastan, olar eki jyl ishinde alǵashqy prototıpti daıyndap, keıin jasandy ıntellektpen jetildirilgen jańa nusqasyn shyǵardy. Komanda aldaǵy ýaqytta qurylǵyny tolyq avtomattandyryp, qoldanýǵa barynsha yńǵaıly etip jasamaq, Sonymen qatar, ınvestorlar men seriktester tartyp, Úmit-ti halyqaralyq naryqqa shyǵarýdy josparlap otyr.