Bul týraly Kıev qalasynyń ákimi Vıtalıı Klıchko BBC arnasyna bergen suhbatynda aıtty, dep habarlaıdy Egemen.kz.
Onyń aıtýynsha, bul ádiletsiz bolǵanymen, beıbitshilikti saqtaý úshin ýaqytsha sheshim retinde qarastyrylýy yqtımal.
«Aımaqtan aıyrylý – aýyr. Bul ádiletti de emes. Biraq beıbitshilik úshin, ýaqytsha tynyshtyq úshin bul oryndalýy múmkin jospar», dedi Klıchko jýrnalıster saýalyna jaýap bere otyryp.
Alaıda 53 jastaǵy saıasatker, álemge aty málim burynǵy bokstan álem chempıony, ýkraın halqy Reseıdiń okkýpasııasyn eshqashan moıyndamaıtynyn qatań túrde málim etti.
Onyń bul málimdemesi Kıevke jasalǵan zymyran jáne dron shabýyldarynan keıin, 12 adamnyń qaza taýyp, 80-nen astam turǵynnyń jaraqat alǵanynan keıin aıtyldy. Bul – sońǵy aılardaǵy eń joıqyn shabýyldardyń biri retinde tirkelip otyr.
2022 jyly Reseı Federasııasynyń prezıdenti Vladımır Pýtın Ýkraınaǵa qarsy keń aýqymdy soǵys bastady. Qazirgi tańda Máskeý Ýkraınanyń shamamen 20 paıyz aýmaǵyn baqylaýda ustap otyr.
Klıchko – el basshylyǵynyń joǵarǵy deńgeıindegi tulǵalarynyń biri retinde Ýkraınanyń aýmaqtyq tutastyǵyna qatysty osyndaı málimdeme jasaǵan alǵashqy saıasatkerlerdiń biri. Ol mundaı sheshim ýaqytsha sıpatta ǵana bolýy múmkin ekenin atap ótti.
Aıta keteıik, Vıtalıı Klıchko men prezıdent Vladımır Zelenskııdiń arasynda saıası kózqaras qaıshylyǵy burynnan belgili. Ákim prezıdent komandasyn óz ókilettigin shekteýge tyrysyp otyr dep birneshe ret synǵa alǵan.
BBC Radio 4 arnasynyń «Today» baǵdarlamasyna bergen suhbatynda ol prezıdent Zelenskıı beıbit ómirge qol jetkizý úshin «aýyr, biraq qajet sheshimge» barýy kerek ekenin aıtqan bolatyn.
Sondaı-aq aqpan aıynda Aq úıde bolǵan Zelenskıı men Donald Tramp arasyndaǵy ashyq kelispeýshilikke toqtalǵan Klıchko, mundaı máseleler kamera aldynda emes, jabyq jaǵdaıda sheshilýi qajet ekenin meńzedi.
Aıta keteıik, apta basynda burynǵy AQSh prezıdenti Donald Tramp Zelenskııdi beıbit kelissózderge kedergi keltirip otyr dep aıyptaǵan edi. Basty sebep – Ýkraına basshysynyń Qyrymdy Reseı aýmaǵy retinde moıyndaýdan bas tartýy. Qyrym – 2014 jyly Máskeý tarapynan anneksııalanǵan aımaq.
Qazir Ýkraına halqynyń pikiri de ekige jarylyp otyr. Reseıdiń toqtaýsyz shabýylynan zárezap bolǵan jergilikti halyqtyń bir bóligi Zelenskııdiń saıasatyn qoldaıtynyn jetkizse, bir qatary eldegi barlyq dúrbeleń Zelenskııdiń saıasatker retinde biliksizdiginiń kesirinen ekenin aıtyp jatyr.