Aqtóbe qalasyndaǵy Qazaqstan halqy Assambleıasynyń ǵımaratynda ótken «Máńgilik El – bolashaǵy birtutas ult» oblystyq patrıottar forýmyna oblystyq máslıhat depýtattary, qoǵamdyq uıymdar men etnomádenı birlestikterdiń ókilderi, belsendi jastar qatysty. Forýmnyń basty maqsaty «Máńgilik El» patrıottyq aktisi jobasyn jan-jaqty talqylaý, jalpyhalyqtyq «Máńgilik El» ıdeıasyn, «Memleket qurylysynyń ári qaraı damýynyń 100 naqty qadamy» – Ult josparyn nasıhattaý bolyp tabyldy.
Forýmda sóz alǵan oblys ákiminiń orynbasary Sara Nurqatova Elbasy Nursultan Nazarbaevtyń bes ınstıtýttyq reformany iske asyrý úshin belgilegen 100 naqty qadamyna toqtala kelip, ony álemdegi joǵary maqsattarǵa negizdelgen baǵdarlamalardyń biri retinde baǵalady. Ult josparyn júzege asyrý arqyly nátıjeli belesterge qol jetkizý úshin azamattyq qoǵam men memlekettiń is-qımylyn jumyldyrýdyń mańyzdylyǵyn atap ótti.
– Prezıdenttiń «Máńgilik El» ulttyq ıdeıasy men bes ınstıtýttyq reformany júzege asyrýǵa arnalǵan «100 naqty qadam» baǵdarlamasy elimizdiń ekonomıkasyn nyǵaıtýǵa, halyqtyń turmys-tirshiligin jaqsartýǵa, kúrdeli kezeńnen senimdi ótýge serpin bereri sózsiz. Bul baǵdarlamanyń qazirgi tańdaǵy álemdik jáne ishki syn-qaterlerge tolyqtaı jaýap bere alatynyna, Qazaqstannyń damyǵan otyz eldiń qataryna enýin qamtamasyz etetin baıandylyǵyna barsha qazaqstandyqtar senimdi. Mundaı ulttyq irgeli isterdi júzege asyrýǵa árqaısymyz belsene qatysýymyz qajet. Sonyń ishinde jalyndy jastarǵa júkteler jaýapkershilik joǵary, olar elimizdiń ekonomıkalyq damýy men ózge memleketter aldyndaǵy bedeliniń bıik bolýyna óz úlesterin qosyp, aldyńǵy lekten kórinýleri tıis, – dedi ol.
Budan keıin sóz alǵan oblystyq máslıhattyń depýtaty, Aqtóbe kólik, kommýnıkasııa jáne jańa tehnologııalar kolledjiniń dırektory Jeńisgúl Muhambetpaıyzova el damýynyń ózekti máseleleriniń sheshimi baǵdarlanǵan Ult jospary ult pen ulystardy toptastyratynyn alǵa tartty. Ol birlik pen tatýlyqty saqtaý jolynda Elbasy usynǵan «100 naqty qadam» baǵdarlamasynyń baıandylyǵyn qamtamasyz ete otyryp, ár qazaqstandyqtyń osyǵan úles qosýynyń mańyzdylyǵyn aıryqsha atap ótti.
Forýmda «Er Baqyt» áskerı-patrıottyq klýbynyń tóraǵasy Marat Qoılybaev, «Jas kúsh» jastar qoǵamdyq birlestiginiń belsendi múshesi Danııar Izbasarov jáne «Oksana» ýkraın etnomádenı birlestiginiń ókili Veronıka Kabachek sóz sóılep, Memleket basshysy usynǵan Ult josparynyń júzege asyrylýy elimizdegi tatýlyq pen turaqtylyqty nyǵaıtýǵa berik negiz qalaıtynyn jetkizdi. Sondaı-aq, shara barysynda Astana qalasynda ótetin respýblıkalyq patrıottar forýmyna oblys atynan qatysatyn delegattar tanystyrylyp, jas ónerpazdar patrıottyq ánder oryndady.
Bul forým onsyz da jańalyqqa jany qumar, jańa isterge yntyq jastardyń jigerin janyp, jarqyn bolashaqtyń qojalary ózderi ekenine senimderin nyǵaıta tústi.
Satybaldy SÁÝIRBAI,
«Egemen Qazaqstan».
Aqtóbe oblysy.
Sýretti túsirgen
Haıreden Raýshanov.