Qaraǵandy oblysyndaǵy Spassk oqý-jattyǵý ortalyǵynda «AMANAT» partııasy janyndaǵy «Jastar Rýhy» jastar qanaty uıymdastyrǵan dástúrli «Qaisar» áskerı-patrıottyq oıyndary ótti. Aýqymdy sharaǵa elimizdiń túkpir-túkpirinen 300-den astam qatysýshy jınaldy. Olardyń qatarynda «Jas sarbaz» qozǵalysynyń tárbıelenýshileri, «Álııashylar» uıymynyń qyzdary, áskerı daıyndyq pániniń muǵalimderi, áskerı kafedralar men 100-den astam joǵary synyp oqýshylary bar, dep habarlaıdy Egemen.kz.
Eki kúnge jalǵasqan oıyndarǵa QR Májilisi men «AMANAT» partııasynyń Tóraǵasy Erlan Qoshanov, Qaraǵandy oblysynyń ákimi Ermaǵanbet Bólekpaev, Qorǵanys mınıstrligi men «Astana» óńirlik qolbasshylyǵynyń ókilderi, depýtattar, ardagerler men qoǵam qaıratkerleri qatysty.
Erlan Qoshanov óz sózinde 2022 jyly «AMANAT» partııasynyń kezekten tys XXII Sezinde «Jastar Rýhy» jastar qanaty «Qaisar» áskerı-patrıottyq oıyndaryn turaqty túrde ótkizý jóninde bastama kótergenin atap ótti. Bul bastamaǵa Memleket basshysy Qasym-Jomart Toqaev qoldaý bildirdi. Osy jyldar aralyǵynda «Qaisar» áskerı-patrıottyq oıyndary turaqty túrde ótkizilip, jaı ǵana áskerı-sporttyq is-shara emes, naǵyz erliktiń, patrıotızmniń, jaýapkershilik pen tártiptiń mektebine aınaldy. Jalpy, osy ýaqyt ishinde jobaǵa 5 myńǵa jýyq ul men qyz qatysty.
«Prezıdent aıtqandaı, biz urpaǵymyzǵa damyǵan ári myqty memleket qaldyrýymyz kerek. Ol úshin jastardy durys tárbıeleý qajet. Bul iste ásker erekshe ról atqarady. Búginde Qazaqstannyń Qarýly Kúshteri tek áskerı daıyndyqpen shektelmeıdi. Kez kelgen tótenshe jaǵdaı men tabıǵı apat oryn alsa, áskerimiz birinshi bolyp kómek qolyn sozady. Bul – Otan aldyndaǵy paryz ben halyq aldyndaǵy jaýapkershiliktiń shynaıy kórinisi. Sizderdiń boılaryńyzda da osyndaı qaısar rýh pen otanshyldyqtyń bar ekenine kámil senemin!», dedi ol.
Sondaı-aq partııa Tóraǵasy osy oıyndardyń ekinshi dúnıejúzilik soǵystaǵy Jeńistiń 80 jyldyǵy qarsańynda ótkizilýiniń sımvoldyq máni zor ekenin jetkizdi. Surapyl soǵys jyldary 1,7 mıllıonnan astam otandasymyz nemese respýblıka halqynyń árbir tórtinshi turǵyny maıdanǵa attanyp, jartysyna jýyǵy qaıtyp oralmady. Olardyń janqııarlyq erligi men qaısarlyǵy urpaq jadynda jáne el tarıhynda máńgi saqtalady. Jeńistiń 80 jyldyq mereıtoıyna oraı, elordada Qazaqstan armııasynyń qýaty men urpaqtar sabaqtastyǵyn aıqyndaıtyn aýqymdy parad ótedi.
Jalpy, «Qaisar» oıyndary jas patrıottardy tárbıeleý isiniń mańyzdy bóligine aınaldy. Munda el jastary qarý-jaraqty durys qoldana bilýdi úırenip, kúsh-qýaty men tózimin shyńdap qana qoımaı, komandalyq rýh qalyptastyrýǵa jáne árkez el múddesin qorǵaýǵa daıyn bolýǵa daǵdylanady. Osyndaı qasıetter ár adamǵa kerek. Tipti, kez kelgen salada qajet. Olar adam minezin shyńdap, alǵa qoıǵan maqsatqa jetýge jáne jaýapkershilikti sezinýge úıretedi.
Erlan Qoshanov memleket saıasatyna sáıkes, áskerı qyzmetshilerdi qoldaý jáne áskerı qyzmettiń bedelin arttyrý máselesine erekshe mán beriletinin atap ótti. Búginde Qazaqstan armııasy jaýyngerlik daıyndyqtyń joǵary deńgeıin kórsetip, onyń áleýeti jyldan jylǵa artyp keledi. Memleket tarapynan áskerı qyzmetshilerge áleýmettik qoldaý kórsetý sharalary únemi kúsheıtilýde. Sonyń biri – áskerde azamattyq boryshty ótegennen keıin tegin joǵary bilim alý múmkindigi. Qazirdiń ózinde 4500-den astam jas azamat osy múmkindikti paıdalanyp úlgerdi.
Sonymen qatar «AMANAT» partııasynyń bastamasymen áskerı-patrıottyq tárbıe týraly zań jobasy ázirlendi. Qujat azamattarǵa áskerı-patrıottyq tárbıe berýdiń birtutas júıesin qurýǵa jáne osy jumysqa barlyq memlekettik uıymdy belsendi tartýǵa baǵyttalǵan. Sondaı-aq zań jobasy bastaýysh áskerı daıyndyq páni muǵalimderiniń mártebesin arttyrýdy kózdeıdi. Bolashaqta áskerı-patrıottyq úıirmelerdiń túlekteri áskerı joǵary oqý oryndaryna túsý jáne áskerı qyzmetke kelisimshart boıynsha ornalasý kezinde jeńildikterdi paıdalana alady. Buǵan qosa, áskerge shaqyrylǵan jastarǵa qoldaý kórsetýdiń qosymsha sharalary qarastyrylýda. Atap aıtqanda, jumys oryndaryn saqtap qalýdan bastap, oqý aqysyn óteý mindetinen bosatýǵa deıin kózdelýde.
Sondaı-aq zań jobasyna bastaýysh áskerı daıyndyq páni muǵalimderiniń kıim kııý tártibi týraly norma da engizildi. Bul bastamany kezinde «Muǵalim Talks» platformasy aıasynda petropavldyq bastaýysh áskerı daıyndyq pániniń muǵalimi Darhan Qospanov kótergen bolatyn. «AMANAT» partııasynyń depýtattary bul usynysty qoldady.
Oıyndar eki kún jalǵasady. Elimizdiń túkpir-túkpirinen kelgen jastar oq atý, áskerı estafeta, avtomatty shashyp-jınaý, zııatkerlik saıystar men taktıkalyq tapsyrmalar arqyly bilimin, kúsh-jigerin, tózimdiligin jáne jeńiske degen talpynysyn tanytady. Bıyl dástúr men zamanaýı tehnologııany ushtastyrýǵa erekshe nazar aýdaryldy. Baǵdarlamaǵa alǵash ret ulttyq sport túrleri men sıfrlyq pánder engizildi.
Áskerı-patrıottyq oıyndar aıasynda oqý-jattyǵý ortalyǵynyń aýmaǵynda Uly Jeńistiń 80 jyldyǵyna arnalǵan kórme uıymdastyryldy. Bul qadam maıdangerlerdiń eren erligin jastar qaýymynyń esine salyp, urpaq sabaqtastyǵynyń taǵy bir mańyzdy sımvolyna aınaldy.