2024 jyldyń qorytyndysy boıynsha Taldyqorǵan qalasynda áleýmettik qoldaý sharalary aıasynda 8 357 azamatqa kómek kórsetildi. Bul sanatqa az qamtylǵan otbasylar, múmkindigi shekteýli jandar, jalǵyzbasty qarttar jáne basqa da áleýmettik osal toptar kiredi. Qalalyq ákimdiktiń bastamasymen atalǵan azamattarǵa naqty qoldaý kórsetý baǵytynda júıeli jumystar atqarylyp keledi.
«Azamattarǵa arnalǵan úkimet» memlekettik korporasııasy» KEAQ arqyly turǵyndarǵa jalpy somasy 1 391,0 mıllıon teńge kóleminde áleýmettik tólemder júrgizildi. Bul tólemder zeınetaqy, járdemaqy, ataýly áleýmettik kómek jáne basqa da memlekettik qoldaý túrlerin qamtıdy.
Taldyqorǵan qalalyq jumyspen qamtý jáne áleýmettik baǵdarlamalar bóliminiń basshysy Mádı Qaıratqalıuly Shakenovtiń aıtýynsha, áleýmettik saıasatty júzege asyrýda memlekettik organdar men jergilikti ózin-ózi basqarý qurylymdarynyń úılesimdi jumysy mańyzdy ról atqaryp otyr.
– Memlekettik qoldaý sharalarynyń negizgi maqsaty – halyqtyń álsiz tobyna qoldaý kórsetý arqyly olardyń ómir súrý sapasyn arttyrý. Biz tek qarjylaı kómekten bólek, psıhologııalyq, quqyqtyq jáne áleýmettik beıimdeý qyzmetterin de usynamyz, – dedi bólim basshysy.
Budan bólek, jyl ishinde qalada birqatar jańa bastamalar qolǵa alynyp, áleýmettik qyzmet kórsetý ortalyqtarynyń qyzmeti keńeıtildi. Sonymen qatar, múmkindigi shekteýli azamattarǵa arnalǵan ınklıýzıvti baǵdarlamalar iske asyrylyp, olarǵa qajetti qural-jabdyqtarmen qamtamasyz etý jumystary júrgizildi.
Áleýmettik qoldaý sharalary aldaǵy ýaqytta da jalǵasyn tabady. Bılik ókilderi bul baǵyttaǵy jumystardyń nátıjeliligin arttyrý maqsatynda sıfrlandyrý, proaktıvti qyzmet kórsetý jáne qoǵammen keri baılanysty nyǵaıtý baǵytynda jumystardy kúsheıtýdi josparlap otyr.