Býrabaıda ótken Ulttyq quryltaıda Memleket basshysy qazaqy tazynyń halyqaralyq deńgeıde tirkelgenin atap ótip, bul oqıǵanyń el mádenıetinde mańyzdy oryn alatynyn jetkizgen bolatyn. Osyǵan oraı EXPO halyqaralyq kórme ortalyǵynda Astana Winner 2025 halyqaralyq ıtter kórmesi men «Qazaqy tazy – 2025» mono tuqymdy ıtter kórmesi ótti, dep jazady Egemen.kz.
Kórmege tuqymy bólek, turpaty erek 400-den astam ıt qatystyryldy. Onyń ishinde 50 qazaqtyń qumaı tazysy kórermen nazaryn erekshe aýdardy. Bitimi sıdań, qulaǵy deldeń, janary ótkir, sıraqtary shymyr birinen-biri ótken tazylar kezegin kútip asqan pańdyqpen tynystap jatty.
Itter arnaýly alańda aıryqsha qasıetterin kórsetip, daıyndyqta shynyqqandyǵyn anyq ańǵartty. Iesiniń buıryǵyn buljytpaı oryndap degdarlyǵyn tanytty. Qazylar alqasy ár qatysýshynyń júris-turysyna, dene bitimine, júniniń kútimine deıin baǵalady. Ásirese, tazylarǵa qoıylatyn talap joǵary boldy. Asyl tuqymdylarǵa tóreshilik etý mindetin elimizden bólek Japonııa, Serbııa jáne Latvııadan arnaıy shaqyrylǵan halyqaralyq sanattaǵy qazylar atqardy.
Kórmeniń basty uıymdastyrýshysy, Qazaqstan kınologtar odaǵynyń prezıdenti Baýyrjan Serikqalıdiń aıtýynsha, mundaı is-sharalar qoǵamdaǵy ıt baptaý mádenıetin arttyryp, ony halyqaralyq standarttarǵa saı damytýǵa serpin beredi.
«Byltyrǵy jyldyń qyrkúıeginde Halyqaralyq kınologııa federasııasy qazaqtyń tazy tuqymyna halyqaralyq moıyndaý mártebesin berdi. Rasynda tarıhı oqıǵa. Bul ǵasyrlar boıy babalarymyzdyń seıildegi serigi bolǵan qumaı tazynyń álemdik deńgeıde tanylýy. Alaıda áli de mańyzdy jumystar atqarylýy tıis. Federasııa erejelerine sáıkes, qazaqy tazynyń tolyqqandy moıyndalýy tek 10 jyldan keıin ǵana júzege asady. Bul kezeńde halyqaralyq kınologııalyq is-sharalarǵa belsendi qatysý, tuqymnyń tazalyǵyn saqtaý, densaýlyǵyn baqylaý, ańshylyq qasıetterin damytý jáne tazynyń halyqaralyq bedelin nyǵaıtý basty mindet bolyp tur», deıdi Baýyrjan Serikqalı.
Aıtqandaı, Memleket basshysy Qasym-Jomart Toqaev ta tazyny erekshe jaqsy kóredi. Fransııalyq áriptesine tazynyń kúshikterin syıǵa tartqany jurt kóńiline jylý syılady. Sondaı-aq prezıdent Qazaqstannyń halyq ártisi Dımash Qudaıbergenge de erekshe iltıpatpen osy baǵaly syıdy tartý etken bolatyn. Ánshi tazyǵa «Ǵaryshker» dep at qoıyp, birge túsken sýretin áleýmettik paraqshasyna jarııalaǵan edi. Oraıly tusta Baýyrjan Serikqalıdan osy oqıǵalardyń tazy brendine qalaı áser etkenin surap kórdik.
«Álbette, Prezıdenttiń tazyǵa degen qyzyǵýshylyǵy men ony halyqaralyq arenada tanytýǵa jasaǵan qadamdary tazynyń mártebesin odan ári kóterdi. Qasym-Jomart Kemelulynyń Emmanıýel Makronǵa tazy syılaýy men Dımash Qudaıbergenniń osy kıeli janýarǵa kóńil bólýi – ulttyq brendimizdi álemge tanytýdaǵy aıryqsha oqıǵa. Tazyny syı retinde tabystaý – onyń tek janýar ǵana emes, ulttyq sımvol ekenin bildiredi. Bul jaıttar halyqaralyq deńgeıde qazaqy tazynyń tanylýyna yqpal etip, onyń álemdik kınologııadaǵy ornyn nyǵaıtýǵa zor áser etti», deıdi kınologtar odaǵynyń prezıdenti B. Serikqalı.
Kórmege kelgen tazy baptaýshylar tazynyń negizgi qasıeti júıriktiginde ekenin aıtady. «Ony baýlý – uzaq úderis: toq tazynyń ishin aıdatyp, qoıasyn túsiredi, ony ábden júgirtip, tynysyn ashady. Sodan keıin ǵana túlkiniń quıryǵymen aýyzdandyryp, qoıanǵa salyp baptaıdy», deıdi olar. Mine osyndaı qajyrly qaıratty talap etetin jumysty kórmeniń aıasynda ǵana emes, úlken arenada baǵalasa – nur ústine nur degen tilegin jetkizdi.