Astana qalasyndaǵy Ardagerlerge arnalǵan Ortalyq klınıkalyq gospıtalde jyl saıyn 2,5 myńǵa jýyq adam medısınalyq kómek alady. Olardyń qatarynda Uly Otan soǵysyna qatysýshylar men múgedekter, ınternasıonalıst-jaýyngerler, Chernobyl apatyna qatysqandar, saıası qýǵyn-súrgin qurbandary, Semeı polıgonynan zardap shekkender jáne olarǵa teńestirilgen ózge de azamattar bar.
Gospıtal pasıentteriniń ortasha jasy shamamen 70 jasty quraıdy.
Stasıonarda rentgenografııa, FGDS, barlyq túrdegi ÝDZ, EKG, SMAD jáne basqa da zerttep-qaraýlardy qamtıtyn tolyq konsýltasııalyq-dıagnostıkalyq kómektiń tolyq spektri kórsetiledi.
Mekemede aseptıkalyq bloktary bar gospıtaldyq farmasııa bólimi, óz zerthanasy jáne dıetolog dárigerdiń baqylaýymen emdik taǵam ázirlenetin ashana jumys isteıdi.
Jeńis kúni qarsańynda gospıtalge Parlament Senatynyń depýtattary keldi. Is-sharaǵa Densaýlyq saqtaý vıse-mınıstri Tımýr Muratov pen gospıtaldiń dırektory Dınara Ýrazalına qatysty.
Depýtattar medısınalyq kómektiń jaǵdaıymen tanysyp, bólimshelerdi aralap, pasıenttermen jáne medısına qyzmetkerlerimen áńgimelesti.
Nazar aýdarylǵan basty máseleler — zańnamalyq normalardyń júzege asyrylýy, resýrstyq qamtamasyz etý jáne ardagerler men olarǵa teńestirilgen azamattarǵa kórsetiletin áleýmettik qoldaý deńgeıi.
Senatorlar áskerı-medısınalyq júıeni odan ári nyǵaıtýdyń, normatıvtik bazany jetildirý men vedomstvoaralyq ózara is-qımyldy damytýdyń mańyzdylyǵyn atap ótti.