ASTANA. 2 tamyz. Astanada esirtki bıznesine qarsy kúres departamentiniń qyzmetkerleri esirtki taratýmen aınalysqan qylmystyq toptyń kózin joıdy. Bul týraly Ishki ister mınıstrliginiń esirtki bıznesine qarsy kúres departamentine silteme jasaǵan today.kz habarlady.
Qylmystyq toptyń músheleri esirtkige aqshany páter tonaý arqyly taýyp otyrǵan. Urlanǵan zattardy satyp, aqshasyna Petropavldan geroın alǵan. О́zderiniń baqylaýda júrgenin sezbegen olar esirtkini Astanadaǵy sybaılastaryna jóneltken.
Esirtki saýdasymen aınalysatyndardyń biri 29 shildede Astanada ustaldy. 30 jastaǵy Soltústik Qazaqstan oblysynyń turǵynyn polıseıler Abaı jáne Ýálıhanov kósheleriniń qıylysynda qolǵa túsirdi. Tintý barysynda odan 44 gramm geroın tabyldy. Munsha geroınnen 500 rettik esirtki dozasy daıyndalatyndyqtan, ol asa iri mólsher bolyp sanalady.
Departamenttiń habarlaýynsha, jedel tergeý amaldary barysynda polıseıler osy iske qatysy bar taǵy eki sybaılasty tutqyndady. Olardyń ekeýi de Petropavl qalasynyń turǵyndary. Olardyń biri 1989 jyly týǵan, al ekinshisi 1984 jylǵy. Bul kúdiktilerden páter esikteriniń qulyptaryn buzýǵa arnalǵan arnaıy qural tárkilendi.
Sonymen qatar, Soltústik Qazaqstanda Astanaǵa «sálemdeme» jibergen toptyń qalǵan músheleri qolǵa tústi. Olardan aıǵaq retinde 2 gramm geroın men taǵy basqa zattar tárkilendi. Ustalǵandardyń beseýi óz qylmystaryn moıyndap otyr.
Búginde polıseıler qolǵa túskenderdiń Qazaqstannyń ár óńirinde tirkelgen kóptegen páter tonaý isterine qatysy bar ekenin anyqtady.
Elaman Qońyr.
Derek: today.kz.
Sýret: mail.ru.