Energetıka mınıstrligi 2025 jyldyń qańtar–sáýir aılaryndaǵy iri munaı óńdeý zaýyttarynyń jumys qorytyndylaryn jarııalady. Resmı derekke súıensek, bıylǵy tórt aıda elimizde 6,092 mıllıon tonna munaı óńdelgen. Bul – ótken jyldyń sáıkes kezeńimen salystyrǵanda 10,8 paıyzǵa artyq kórsetkish, dep habarlaıdy Egemen.kz.
Sarapshylardyń paıymdaýynsha, bul ósim – munaı ónimderine degen ishki jáne syrtqy naryqtardaǵy turaqty suranys pen óndiristik qýattylyqtyń artýynyń aıǵaǵy. Munaı óńdeý zaýyttary jańa tehnologııalardy engizý men tıimdi josparlaý arqyly óndiristi jańa beleske kóterip otyr.
Qara altyndy keshendi óńdeý nátıjesinde elimizde janarmaı óndirisi edáýir ulǵaıdy. Atap aıtqanda:
avtomobıl benzıni – 25,4 paıyzǵa ósip, 2,082 mln tonnaǵa jetti;
dızel otyny – 18,9 paıyzǵa artyp, 1,921 mln tonnany qurady;
avıasııalyq kerosın – 5,3 paıyzdyq ósimmen 0,255 mln tonnaǵa jetti.
Bul kórsetkishter – ishki naryqty sapaly janarmaımen qamtamasyz etý isiniń durys jolǵa qoıylǵanyn ańǵartady. Sonymen qatar, eksporttyq áleýetti arttyrýǵa da múmkindik týyp otyr.
Energetıka mınıstrligi tarapynan bul salada júıeli ári uzaq merzimdi strategııalyq sharalar qolǵa alynǵan. Onyń ishinde: munaı óńdeý zaýyttarynyń úzdiksiz ári tıimdi jumysyn qamtamasyz etý, ishki naryqty munaı ónimderimen tolyq qamtý, sondaı-aq kásiporyndardyń tehnologııalyq jańǵyrýyn jedeldetý syndy baǵyttar bar.
Búginde elimizdegi munaı óńdeý zaýyttary – energetıkalyq qaýipsizdiktiń mańyzdy tirekteriniń biri. Olardyń turaqty jumysy – tek otandyq óndiristiń emes, tutas ekonomıkanyń básekege qabilettiligin arttyrýdyń alǵysharty.