QR Oqý-aǵartý mınıstrligi Balalardyń quqyqtaryn qorǵaý komıteti ınternet keńistiginde taralyp jatqan destrýktıvti mazmundaǵy mýltfılmderge qatysty ata-analarǵa eskertý jasady. Komıtettiń málimdeýinshe, syrt kózge balalarǵa arnalǵan sekildi kórinetin keıbir beınematerıaldar shyn máninde agressııany nasıhattaıtyn jáne adamgershilik qundylyqtarǵa keri áser etetin burmalanǵan aqparatty qamtýy múmkin, dep habarlaıdy Egemen.kz.
Balalardyń psıhoemosıonaldyq saýlyǵyna qaýip tóndirip otyrǵan mundaı kontent sıfrlyq ortada erkin tarap jatyr. Komıtet qazirgi tańdaǵy medıa jáne ınternet formattarynyń jyldam ózgerip jatqanyn atap ótip, zańnamalyq bazany jetildirý boıynsha naqty usynystar daıyndaǵanyn habarlady. Bul usynystar QR Mádenıet jáne aqparat mınıstrligine, sondaı-aq Ishki ister mınıstrligine joldanǵan.
«Qurmetti ata-analar! Balalaryńyzdyń áleýmettik jelilerde qandaı kontent kórip júrgenine, kimdermen sóılesetinine jáne ınternette ne talqylaıtynyna erekshe nazar aýdaryńyz. Balańyzben ashyq áńgimelesip, synı oılaý qabiletin damytýǵa kómektesińiz. Eger kúmándi nemese zııandy kontent baıqasańyz – bul týraly birden quzyrly organdarǵa habarlańyz. Sanaly ata-ana retinde balańyzdyń ómirine belsendi aralasýyńyz – onyń sıfrlyq qaýipsizdiginiń basty kepili», delingen Balalardyń quqyqtaryn qorǵaý komıteti taratqan aqparatta.
Mınıstrlik bul másele boıynsha keshendi sharalar qabyldanatynyn jáne balalardyń qaýipsizdigin qorǵaý úshin tıisti mekemelermen birlesip jumys júrgiziletinin málimdedi.