Keshe Shalqar kóliniń kórikti jaǵasynda jazǵy týrıstik maýsymnyń resmı ashylý rásimi ótti. Atalǵan shara jazǵy demalys maýsymynyń bastalýyna serpin berip, óńirlik týrızmdi damytý jolyndaǵy mańyzdy qadamǵa aınaldy, dep habarlaıdy Egemen.kz.
Is-sharanyń basty maqsaty – óńirdiń tabıǵı kórikti jerlerin keńinen nasıhattap, ishki týrızmniń áleýetin arttyrý. Sonymen qatar, ekologııalyq, mádenı jáne belsendi demalys túrlerin dáripteý. Qaraǵaıly orman men taý jotalarymen kómkerilgen Shalqar kóli taǵy bir márte Sibe kólder tobynyń injý-marjany ekenin dáleldedi.
Uıymdastyrýshylardyń málimetinshe, qazirgi tańda atalǵan aýmaqta 21 demalys bazasy resmı túrde jumys isteıdi. Olardyń jalpy syıymdylyǵy – 2349 tósek-oryn men 558 nómirdi quraıdy. Týrızm salasynda 68 adam turaqty túrde eńbek etse, 31 maýsymdyq qyzmetker tartylǵan. Sońǵy jyldary týrıster legi aıtarlyqtaı artqan: 2023 jyly kóldi 15 600 adam tamashalasa, 2024 jyly bul kórsetkish 20 774 adamǵa jetken. Olardyń arasynda sheteldik qonaqtar da bar.
Merekelik baǵdarlama aıasynda qonaqtarǵa baı mádenı-sporttyq sharalar usynyldy. Atap aıtqanda, shyǵarmashylyq ujymdardyń qatysýymen konsert, ulttyq sport túrlerinen jarystar, jebemen atý, atqa, túıege jáne baggıge miný syndy qyzyqty is-sharalar uıymdastyryldy. Budan bólek, «TOR ALTAI» demalys bazasyna deıin jaıaý ekskýrsııa, «ómir soqpaǵy» baǵytymen serýen jáne belgili zertteýshi B. V. Sherbakovtyń biregeı tanystyrylymy ótti.
Shara barysynda ulttyq taǵamdar usynylǵan etnoaýyl, qolónershiler jármeńkesi jáne qazaq halqynyń salt-dástúrin tanystyratyn ekspozısııalar kópshilikke erekshe áser qaldyrdy. Kesh sońynda juldyzdy aspan astynda ashyq aspan aıasynda ótken jastar dıskotekasy merekeniń kórkin asha tústi.
Jazǵy maýsymnyń ashylýy — óńir turǵyndary men qonaqtary úshin qýanyshty oqıǵa ǵana emes, sonymen qatar týrızm ınfraqurylymyn, shaǵyn jáne orta bıznesti damytýǵa tyń serpin beretin mańyzdy bastama. Shalqar kóli — tabıǵatty, mádenı murany jáne salaýatty ómir saltyn baǵalaıtyn jandar úshin aıryqsha tartymdy meken ekenin taǵy bir márte dáleldedi.