«Taldyqorǵan – Úsharal» gaz qubyrynyń jelilik bóligin salý aıaqtaldy

Belgili bolǵandaı, «Taldyqorǵan – Úsharal» gaz qubyrynyń jelilik bóligin salý jumystary aıaqtalǵan. Qazir avtomatty gaz taratý stansalary turǵyzylyp jatyr.

Aldymen «Jansúgirov» AGTS-nyń alańyna barǵan resmı qonaq­tar mundaǵy atqarylyp jatqan ju­mystarmen tanys­ty. Bul rette Sanjar Jarkeshov birinshi kezekte jumystyń sapasyna basa kóńil bólýdi qatań tapsyrdy.

«Búgingi kúni «Taldyqorǵan – Úsharal» magıstraldy gaz qubyryn salýǵa úlken nazar aýdarylyp otyr. Bul – Memleket basshysynyń tapsyrmasymen, ulttyq qordyń qarjylaı qoldaýymen qolǵa alyn­ǵan aýqymdy joba. О́tken jyly Úki­met basshysy Jetisý oblysyna kelgende qury­lys jumystary bastalǵan bolatyn. Jobanyń áleýmettik mańyzyn eskere otyryp, jumystardy qarqyndy júrgizdik. Sonyń nátıjesinde belgilengen merziminen bir jarym jyl buryn, ıaǵnı 2025 jyldyń jylytý maýsymyna deıin bitiremiz dep josparlap otyrmyz. Bul «QazaqGaz», oblys ákimdigi jáne merdiger kompanııa – úsh taraptyń birlesken úlgili komandalyq jumysynyń nátıjesi», dedi «QazaqGaz» UK» AQ basqarma tóraǵasy Sanjar Jarkeshov.

Aıta keteıik, jobaǵa Energetıka mınıstrligi, «Samuryq-Qazyna» qory men Jetisý oblysynyń ákimdigi qoldaý bildirdi.

Jobanyń tehnologııalyq shemasyna sáıkes gaz qubyrynyń jalpy uzyndyǵy 302,441 km quraıdy, jobalyq qysymy RR=9,8 MPa. Jobada sondaı-aq 6 gaz qubyry burmasyn, «Jansúgi­rov», «Qapal», «Sarqan», «Qoılyq», «Qabanbaı», «Úsharal» – 6 avtomatty gaz taratý stansasyn salý kózdelgen.

Búgingi tańda jańa gaz qubyrynyń jelilik bóliginiń qurylysy aıaqtal­dy. 

Qazirde barlyq alty avtomatty gaz taratý stansalarynyń qurylysy qatar bastaldy. Qurylysqa 148 arnaıy tehnıka men 356 jumysshy jumyldyryldy. Qurylys jumystary erekshe baqylaýda, kesteden ozyp keledi.

Osy oraıda oblys ákiminiń orynbasary Áset Qanaǵatov eldi mekenderdiń ishki jelilerin júrgizýdiń daıyndyq jumystary týraly aıta kele:

«Taldyqorǵan – Úsharal» magıstraldy gaz qubyry jobasynyń arqasynda Aqsý, Sarqan, Alakól aýdandarynda 66 eldi mekenge gaz tartylatyn bolady. Alty eldi mekendi bıyl, qalǵan 60-yn kelesi jyly gazǵa qosamyz. Sonyń ishinde Aqsý qant zaýyty da bar. Osy sharalardyń barlyǵy halyqtyń turmys sapasyn jaqsartý­ǵa, sol sııaqty kásipkerlik pen óndiris oryndarynyń jumysyn jandandyrýǵa barynsha tıimdi, óńirdiń ekonomıkasyn damytýǵa úlken serpin beredi», dedi.

Eske sala ketelik, Jetisý oblysynda 192 eldi meken gazdandyrýǵa jatady. Oblys bólingende nebári bes eldi mekende ǵana gaz bolǵan, búgingi kúni gazdandyrylǵan eldi mekender sany 84-ke jetip, gazdan­dyrý deńgeıi 58,2%-dy qurady. Jyl sońyna deıin kógildir otyn tar­tylǵan eldi mekender sanyn 126-ǵa, gazdandyrý kórsetkishin 71,4%-ǵa jetkizý jos­parlanyp otyr, ıaǵnı 500 myń adam gazdyń ıgiligin kóredi degen sóz. Oǵan qosa «Taldyqorǵan – Úsharal» magıstraldy gaz qubyry qurylysy­nyń arqasynda 66 eldi meken gazǵa qosylady. Sóıtip, 2028 jylǵa deıin oblystyń gazdandyrýǵa jatatyn 192 eldi mekeni tolyq kógil­dir otynǵa qol jetkizetin bolady.