Prezıdent mádenıet jáne óner qyzmetkerlerine alǵys bildirdi

«Mádenıet – ulttyń tólqujaty. Jahan jurty elimizdi, eń aldymen, ónerimiz arqyly tanyp biledi. Biz – Uly dalada tamyr jaıǵan biregeı mádenıettiń zańdy muragerimiz. Qazaq jerinen shyqqan qaıtalanbas óner ıeleriniń teńdessiz týyndylary tutas ultty tárbıeledi. Qazir tól mádenıetimiz dúnıe júzine tanylyp jatyr. Talantty mýzykanttarymyz álemdik sahnalarda tabysty óner kórsetip júr. Qazaq kınogerleri túrli halyqaralyq baıqaýlarǵa qatysyp, sarapshylardyń joǵary baǵasyna ıe bolýda. Elordamyzda Dúnıejúzilik kóshpendiler oıyndary tabysty ótti. Aqtaý qalasy túrki áleminiń mádenı astanasy bolyp jarııalandy. Rýhanı muralarymyz sıfrlyq formatqa kóshirile bastady. Taıaýda ultymyzdyń bir jarym myń án-kúıi men folklorlyq murasy eń tanymal halyqaralyq platformalarǵa salyndy. Tól ónerimiz kreatıvti ındýstrııa arqyly barynsha nasıhattalyp jatyr»,  dedi Prezıdent.

Qasym-Jomart Toqaevtyń aıtýynsha, memleket óner salasyn órkendetýge árdaıym erekshe mán beredi. О́ıtkeni mádenıeti ozyq eldiń rýhy bıik bolady.

«Byltyrdyń ózinde 45 jańa mádenıet nysany salyndy. Bul jumys bolashaqta da jalǵasyn tabady. Teatr – rýhanııatymyzdyń negizgi tireginiń biri. Ulttyq quryltaıdyń Býrabaıda ótken otyrysynda aımaqtaǵy teatrlardy damytý týraly naqty tapsyrma berildi. Teatrlardyń kópshiligi tolyq jańǵyrtýdy qajet etedi. Keıbirine jańa ǵımarat kerek. Osy jumysqa kásipkerler men mesenattardy jumyldyrǵan abzal. Bul – álemde keń taralǵan tájirıbe. Mundaı jobalarǵa ınvestısııa salýǵa daıyn azamattar az emes. Men bıznes ókilderin rýhanııatymyzdy damytý isine atsalysýǵa shaqyramyn», dedi Memleket basshysy.

Prezıdent elimizde irgeli mádenıet oshaqtary kóp ekenine nazar aýdaryp, olar talaı jyldan beri kórermen qaýymǵa taǵylymdy qoıylymdar usynyp kele jatqanyn jetkizdi.

«Osy oraıda Bıken Rımova atyndaǵy qazaq drama teatryna, Almaty qalasyndaǵy Memlekettik qýyrshaq teatryna jáne Ǵarıfolla Qurmanǵalıev atyndaǵy fılarmonııaǵa akademııalyq mártebe berý qajet dep sanaımyn. Bul qadam mádenıet mekemeleriniń jumysyna tyń serpin bereri sózsiz», dedi Memleket basshysy.