Qazir Italııanyń áıgili Mılan konservatorııasy uly kompozıtor Djýzeppe Verdıdiń esimimen atalady. Biraq bir qyzyǵy, dál osy oqý orny 1833 jyly ony qabyldamaı qoıǵanyn bireý bilse, bireý bilmeıdi.
Sol jyly 18 jastaǵy Verdı bolashaǵyn mýzykamen baılanystyramyn dep, konservatorııaǵa qujat tapsyrady. Alaıda emtıhan komıssııasy «otyrysy durys emes», «tehnıkasy álsiz» degen synmen talantty jigitti keri qaıtarady. Biraq ýaqyt bárin óz ornyna qoıdy. Verdı tynymsyz eńbeginiń arqasynda álemdik mýzyka óneriniń dara tulǵasyna aınalyp, aty ańyzǵa aınalǵan kompozıtor boldy. Al ony qabyldamaǵan oqý orny keıin dál sol Verdıdiń esimimen ataldy. Bul – talanttyń jolyn eshqandaı tosqaýyl bógeı almaıtynynyń aıqyn dáleli.