Oblys kóleminde aǵymdaǵy 19 sáýir -19 mamyr aralyǵynda ótken «Qaýipsiz jol» jedel profılaktıkalyq is-sharasy sheńberinde mektepter men bilim berý uıymdarynda 300-ge jýyq semınar ótkizilip, barlyq aýdandarda oqýshylar arasynda «Qozǵalystyń jas ınspektorlary» jasaqtarynyń sleti uıymdastyryldy, dep habarlaıdy Egemen.kz.
Oblystyq Polısııa departamentiniń Jergilikti polısııa qyzmeti basqarmasy bastyǵynyń mindetin atqarýshy, polısııa podpolkovnıgi Muratbek Manatovtyń aıtýynsha «Qarabutaq-Qyzylorda-Shymkent» avtojoly boıyndaǵy kempıngterde, demalys oryndarynda júrgizýshilerge túsindirme jumystary júrgizilip, jadynamalar taratylǵan. Avtojol boıynda jergilikti atqarýshy organdar ókilderiniń qatysýymen eki márte jolda qabyldaý aksııasy ótkizildi.
«Is-shara nátıjesinde 10 975 quqyq buzýshylyq anyqtaldy. Olardyń arasynda QR mindetti saqtandyrý týraly zańnamasyn buzǵandar, kóligin mindetti tehnıkalyq tekserýden ótkizbegender, kólik basqaryp kele jatyp uıaly telefonmen sóıleskender men qaýipsizdik beldigin taqpaǵandar, tasymaldaý qaǵıdalaryn buzǵandar kóp. Jaıaý júrginshige jol bermegender men kólik quralyn basqarý quqyǵynan aıyrylǵan júrgizýshiniń kólikti qaıta basqarý faktileri de bar. Jaıaý júrginshiler jolaǵynan ótpegen 1265 derek anyqtaldy», deıdi Muratbek Manatov.
Sonymen qatar, 1281 avtokólik aıyp turaǵyna qoıylyp, 377 avtokóliktiń qozǵalysyn shekteý maqsatynda memlekettik tirkeý belgileri alyndy.