Bilim júıesindegi tyń ári aýqymdy ınfraqurylymdyq bastama – «Keleshek mektepteri» ulttyq jobasy aıasynda bıyl Aqtóbe oblysynda 14 mektep salý josparlansa, qazirgi ýaqytta onyń ekeýi paıdalanýǵa berildi. Bul – Aqtóbe qalasyndaǵy №79 jáne №82 mektepter.
«Qazirgi ýaqytta óńirimizdegi úsh aýysymda jumys isteıtin úsh mektep bar. Osy bilim ordalary Aqtóbe qalasyndaǵy «Eset batyr» turǵyn úı alaby men «Altynorda» shaǵyn aýdanynda ornalasqan. Jaıly mektepterdiń qurylysy tolyq aıaqtalsa, óńirimizde úsh aýysymdy mektepter máselesi tolyǵymen sheshiledi degen oıdamyz», deıdi oblystyq bilim basqarmasynyń basshysy Bulbul Kúzembaeva.
Sáýir aıynda Aqtóbedegi «Eset batyr» turǵyn úı alabynda esigin ashqan №82 mekteptiń 1863 oqýshysy oqý jylyn aıaqtady. Munda erekshe dızaın úlgisimen bezendirilgen, zamanaýı jıhazdarmen jáne oqý-quraldarymen tolyq jabdyqtalǵan, jaılylyq pen yńǵaılylyqqa negizdelgen 52 oqý kabıneti bar. Taratyp aıtsaq, 28 bastaýysh, 7 mektep aldy daıarlyq toby, 14 aǵylshyn kabıneti, STEM zerthanasy, robottehnıka bólmesi, hımııa, fızıka, bıologııa, mýzyka, beıneleý óneri, tigin jáne alǵashqy áskerı daıyndyq kabınetteri balalardyń bilimge degen qulshynysyn arttyrady. Oqý ornynda erekshe bilim berý qajettiligi bar balalarǵa jaǵdaı jasalǵan. Ásirese júrip-turýy qıyn oqýshylarǵa óte yńǵaıly partalar qoıyldy. Sabaqtan tys ýaqytta qosymsha bilim alýǵa yńǵaılastyrylǵan zamanaýı kitaphana men 50 oryndyq oqý zaly, kovorkıng ortalyǵy, 444 oqýshynyń bir mezgilde tamaqtanýyna laıyqtalǵan ashananyń esigi árdaıym ashyq. Mektep aýlasynda belsendi oıyndarǵa laıyqtalǵan alańdar da salyndy.
«Mektebimizde ártúrli sport túrlerine laıyqtalǵan tórt zal bar. Bir zal shahmat, doıby, toǵyzqumalaq oıyndary úshin jabdyqtalsa, taǵy bir zalda ulttyq oıyndarǵa arnalǵan arqan, kıiz, asyqtar qoıyldy. Sportqa qajetti barlyq jabdyqty alǵash kórgenimde óz kózime senbedim», deıdi deneshynyqtyrý pániniń muǵalimi Saǵadat Ismaǵulov.
Robotholdaǵy jabdyqtar – iri óndiris oryndaryndaǵy qural-jabdyqtardyń kishireıtilgen túri. Ony basqarýdy meńgergen oqýshy bolashaqta óndiristegi qondyrǵylarmen jumys isteı alatyn daǵdy qalyptastyrady.
Oqý jylyn aıaqtaǵan ujym búginde mektep janyndaǵy saýyqtyrý lageriniń ashylýyna qyzý daıyndyq ústinde. «Jazǵy lagerdi eki maýsymǵa josparlap otyrmyz. Alǵashqy kezektegiler 2-13 maýsymda kelse, keıingisi 16-27 maýsymda demalady. Oqý jylynyń sońǵy kúnderi lagerge 40 oqýshy jazyldy. Jekelegen sanattaǵy otbasy balalary jergilikti bıýdjet qarjysymen tegin demalady. Jumystan bosaı almaıtyn ata-ana balasy qaraýsyz qalady dep alańdasa, bizge aqyly negizde bere alady. Onyń baǵasy da qymbat emes. Ata-ananyń tólegen qarajaty úsh mezgil tamaqqa jumsalady. Lager jumysy tańerteńgilik 9.00-den keshki 18.00-ge deıin sozylady. Maqsatymyz – balanyń bos ýaqytyn tıimdi ótkizý, olarǵa qaýipsiz orta qalyptastyrý, áleýmettendirý, tárbıe jumysyn kúsheıtý jáne ata-anasyna kómek kórsetý. Patrıottyq, mádenı, sporttyq baǵytta tanymdyq ekskýrsııalar, saıystar men qyzyqty oıyndar ótkiziledi. Balalar úıirme, sheberlik sabaqtaryn ózderi tańdaıdy. Olardyń densaýlyǵyn kúnbe-kún qadaǵalap, ata-anasymen keri baılanys jasaımyz. Demalys aıaqtalǵanda jetistikteri baǵalanyp, marapattalady», deıdi №82 mektep dırektorynyń oqý isi jónindegi orynbasary Aınur Baımısheva.
Sabaqtan bos kezdegi demalys ustaz ben shákirttiń baılanysyn kúsheıtip, oqýynyń qabilet-qarymyn ashýǵa múmkindik beredi. Mektep ujymy shilde aıyna deıin tynym tappaıdy. Bul kúnderi mektep aınalasyn abattandyrý, gúl otyrǵyzý, kógaldandyrý jumysy qyzyp jatyr. Oǵan mekteptiń kishi tehnıkalyq qyzmetkerlerimen birge muǵalimder men oqýshylar da úles qosady. Oqý men eńbekti, tárbıeni qatar ushtastyrǵan «Keleshek mektepterindegi» ishki ahýal ustazdar men ony basqaratyn dırektordyń sheberligi men uıymdastyrý qabiletine baılanysty qalyptasady. Qansha jerden bezendirse de, ujym ishindegi, muǵalim men oqýshy arasyndaǵy qarym-qatynas adamgershilik pen izgilikke negizdelmese, túbegeıli nátıje kútý qıyn.
Aqtóbe oblysy