Elimizdiń Shyǵys Qazaqstan oblysynda kún kúrt sýytyp, Rıdder qalasyna qar tústi, dep habarlaıdy Egemen.kz.
Keshe kúndiz Rıdder qalasynda qar jaýdy. Jergilikti turǵyndar jaýǵan qardyń vıdeosyn áleýmettik jelide bólisip jatyr. «Qazgıdromet» málimetinshe, búgin túnde aımaqtyń shyǵysy men soltústiginde jańbyr jáne qar túrindegi jaýyn-shashyn jaýady.
«Erteń, 29 mamyr kúni, oblystyń shyǵys bóliginde jańbyr jaýady, túnde jáne tańerteń tuman kútiledi. Jel soltústik-shyǵystan, ekpini sekýndyna 18 metrge deıin jetedi. Túnde aýa temperatýrasy +1°-tan +6°-qa deıin, shyǵys pen soltústikte -2 gradýsqa deıin úsik júrýi múmkin», dep naqtylady «Qazgıdromet» ókilderi.
Keshe Marqakól aýdanynda aýa temperatýrasy - 6 gradýsqa deıin tómendegen. Aldaǵy túnde mınýstyq temperatýra Rıdder, Katonqaraǵaı, Glýbokoe aýdandarynda jáne Marqakólde kútiledi.
«Kúndiz aýa temperatýrasy +15…+20° shamasynda kóteriledi, alaıda oblystyń shyǵysynda +10°-tan joǵary bolmaıdy. О́skemende jaýyn-shashyn bolmaıdy, aspandy bult basyp, aýa temperatýrasy +17°-qa deıin kóteriledi», deıdi sınoptıkter.