Qazaqstanda óskeleń urpaqtyń densaýlyǵyn qamtamasyz etý jáne qorǵaý úshin barlyq jaǵdaılar jasalýda. Prezıdenttiń tapsyrmasy boıynsha Úkimet Densaýlyq saqtaý mınıstrligi arqyly balalardyń densaýlyǵyn qorǵaýǵa baǵyttalǵan – ómirge kelgen kúnnen bastap kámeletke tolǵanǵa deıingi júıeli sharalar keshenin júzege asyrady, dep habarlaıdy Egemen.kz aqparat agenttigi.
Árbir sábı dúnıege kelgennen bastap medısınalyq baqylaý júıesimen qamtylǵan. Jyl saıyn 0 – den 6 jasqa deıin 2 mln-nan astam bala skrınıngten ótedi, 4,5 mln-nan astam bala profılaktıkalyq tekserýden ótedi, 1,5 mln-nan astam bala mindetti ımmýndaýdan ótedi. Bul qyzmetterdiń barlyǵy tegin – medısınalyq kómektiń kepildik berilgen kólemi men MÁMS júıesi sheńberinde usynylady. Medısınalyq qoldaý mektep oqýshylaryn da qamtıdy. Elimizde 6,5 myń medısınalyq pýnkt jumys isteıdi, árbir mektep emhanaǵa bekitilgen.
Jańa týǵan nárestelerge erekshe nazar aýdarylady. Qazaqstan Ortalyq Azııada neonataldyq kómek standartyn engizgen birinshi el boldy, onda reanımasııada bir sábıge bir medbıke keledi. Sondaı-aq 1 myńnan astam mamandardy, onyń ishinde óńir elderinen biriktiretin neonatologtardyń onlaın-qaýymdastyǵy quryldy. Qazaqstandyq dárigerler salmaǵy 500 gramnan asatyn jańa týǵan nárestelerdi emdeıdi. Tósek qorynyń 20%-ǵa ulǵaıýynyń nátıjesinde jyl saıyn týa bitken patologııasy bar jańa týǵan nárestelerge 1,5 myńǵa deıin ota jasalady. Otadan keıingi ómir súrý deńgeıi 93%-ǵa jetti. Balalarǵa kórsetiletin medısınalyq kómektiń sapasyn jaqsartý maqsatynda tıimdi perınataldyq tehnologııalar, bala jasyndaǵy aýrýlardy biriktirip basqarý tásilderi jáne erte shaqtaǵy balalardy patronajdyq qadaǵalaýdyń ámbebap-progressıvti modeli halyqaralyq usynymdarǵa saı engizilýde.
Ana men bala densaýlyǵy salasyna baǵyttalǵan júıeli strategııa men eleýli ınvestısııalardyń nátıjesinde elde bala óliminiń kórsetkishteri tarıhı turǵydan eń tómen deńgeıge tústi: neonataldyq ólim – myń tiri týǵanǵa shaqqanda 3,37, náreste ólimi – 6,80, balalar ólimi – 9,30.
Sonymen qatar, onkogematologııa belsendi damyp keledi. Emdeý halyqaralyq hattamalarǵa sáıkes júrgiziledi jáne quramynda polıhımıoterapııa, sáýlelik terapııa, hırýrgııa men gemopoezdik diń jasýshalaryn transplantattaý bar. Bul – allogendi, aýtologty jáne gaploıdentıkalyq ádisterdi qamtıdy. 2013 jyldan beri 515 transplantattaý júrgizildi, onyń ishinde 28-i halyqaralyq donorlar tirkeliminen (Reseı, Germanııa, Polsha) alynǵan týystyq emes donorlarmen júzege asyryldy. Innovasııalyq tásilderdiń – ıntraarterııalyq hımıoterapııa, «ósetin» endoprotezderdiń 3D-modeldeý tehnologııasy jáne targettik ımmýnoterapııanyń nátıjesinde balalardaǵy onkologııalyq aýrýlar boıynsha jalpy ómirsheńdik 70%-dan asty.
Elimizdegi jetekshi klınıkalardyń bazasynda balalar densaýlyǵyn saqtaý boıynsha tásilder únemi jetildirilip, jańa tehnologııalar men dıagnostıkalaý jáne emdeýdiń zamanaýı ádisteri engizilýde.