Parıjde Rolan Garros dodasy bel ortasyna taıady. «Úlken dýlyǵa» sanatyndaǵy týrnırdiń júlde qory – 56 352 000 eýro. Fransııanyń bas shaharyndaǵy dúbirli dodada sátti oınaǵan tennısshiler álemdik reıtıngte joǵarylap qana qoımaı, materıaldyq turǵydan da mol oljaǵa keneledi.
Erler men áıelder arasyndaǵy jekelegen saıysta bas júldeni oljalaǵan tennısshilerdiń árqaısysyna 2 550 000 eýrodan tabys etiledi. Fınalda utylǵandar joǵaryda kórsetilgen somanyń teń jartysyn ıelenedi. Jartylaı fınal men shırek fınalǵa shyqqandar 690 000 pen 440 000 eýrony enshileıdi. Ekinshi (265 000 eýro), úshinshi (168 000 eýro), tórtinshi (117 000 eýro) kezeńde oınaǵandar da mol mólsherde syıaqy alady. Tipten tusaýkeser kezdesýde súringender de úılerine qur qol qaıtpaıdy. Olardyń árqaısysyna 78 000 eýrodan tıesili. Sol sekildi juptyq, aralas juptar arasyndaǵy jarysqa qatysýshylarǵa da edáýir kólemde syıaqy qarastyrylǵan.
Elimizdiń bes tennısshisi irikteý týrnırine qatysty. Biraq báriniń birdeı joly bolmady. Beıbit Juqaev pen Mıhaıl Kýkýshkın alǵashqy aınalymdarda súrindi. Tımofeı Skatov pen Dmıtrıı Popko ekinshi kezeńde jeńilistiń kermek dámin tatty. Tek Aleksandr Shevchenko ǵana, japonııalyq Shıntaro Mochızýkı, fransııalyq Matıs Erarana, aýstrııalyq Fılıp Mısolıchten aılasyn asyryp, jarystyń negizgi bóligine joldama aldy. Sóıtip, elimizdiń tórt oıynshysy Rolan Garrosta óner kórsetý quqyǵyna ıe boldy.
Elimizdiń eń úzdik tennısshisi Elena Rybakına tusaýkeser kezdesýinde Belında Benıchıchen oınaýǵa tıis edi. Alaıda Shveısarııanyń ókili jaraqatyn jeleý etip, jarysqa qatysýdan bas tartty. Onyń ornyn argentınalyq Hýlııa Rıera basty. Otandasymyz WTA reıtınginde 204-orynda turǵan oıynshyny 6:1, 4:6, 6:4 esebimen utty. Iýlııa Pýtınseva da irikteý týrnırinde top jarǵan taǵy bir Argentına ókili Solano Seramen saıysqa tústi. Bul tartysta otandasymyz jeńiske jetti – 6:1, 4:6, 6:4. Erler arasyndaǵy elimizdiń birinshi raketkasy Aleksandr Býblık ATR tiziminde 92-satyǵa jaıǵasqan Aýstralııa ókili Djeıms Dakvortty esh qınalmaı eńserdi. 6:2, 6:4, 6:4 Aleksandr Shevchenko serbııalyq Dýshan Laıovıchke san soqtyrdy – 6:2, 6:4, 7:6.
Ekinshi kezeńde Rybakına amerıkalyq Iva Iovıchti (6:3, 6:3), Pýtınseva taıpeılik Djoanna Garletti (7:6, 6:3), Býblık aýstralııalyq Aleks de Mınordy (2:6, 2:6, 6:4, 6:3, 6:2) jolda qaldyrdy. Shevchenko amerıkalyq Itan Kýınge (4:6, 6:4, 7:6, 6:7, 5:7) ese jiberdi. Úshinshi aınalymda Elena latvııalyq Elena Ostapenkony (6:2, 6:2), Aleksandr portýgalııalyq Enrıke Roshany (7:5, 6:1, 6:2) utty. Iýlııa reseılik Mırra Andreevadan (3:6, 1:6) aılasyn asyra almady. Tórtinshi kezeńde E.Rybakına súrindi. Jerlesimiz polshalyq Iga Shventektiń osal tusyn taba almady (6:1, 3:6, 5:7).
Tórtinshi kezeńde Aleksandr Býblık álemniń besinshi raketkasy Djek Dreıpermen kúsh synasty. Bul básekeniń favorıti ATR tiziminde otandasymyzdan 57 saty joǵary turǵan Ulybrıtanııanyń oıynshysy ekeni anyq edi. Degenmen bul keshte Aleksandr óte sátti oınap, 5:7, 6:3, 6:2, 6:4 esebimen jeńiske jetti. Sóıtip, el tennısshileri arasynda jarys jolynda jalǵyz Býblık qana qaldy.