Kanadada orman órtteri kúrt kúsheıip, eldiń birneshe aımaǵynda kúrdeli jaǵdaı qalyptasqan. CBC telearnasynyń habarlaýynsha, Saskachevan provınsııasynda bastalǵan alapat órt saldarynan 400-den astam úı janyp ketken, dep habarlaıdy Egemen.kz.
Tabıǵı apattyń saldarynan 9 myńǵa jýyq turǵyn qaýipsiz jerge evakýasııalanǵan. Jergilikti bıliktiń málimetinshe, olardyń sany jaqyn kúnderi 15 myń adamǵa deıin jetýi múmkin.
Orman órti Saskachevanmen ǵana shektelmeı, kórshiles Alberta jáne Manıtoba provınsııalaryna da taralǵan. Tilsiz jaý eldiń batys bóliginde ornalasqan orman alqaptary men eldi mekenderge qaýip tóndirip otyr. Qazirgi tańda órt sóndirý jáne qutqarý qyzmetteri apatty aımaqtarda táýlik boıy jumys istep jatyr.
Aıta keteıik, joǵalǵandar men jaraqat alǵandar týraly naqty málimetter áli jarııalanǵan joq.
Kanada úkimeti tabıǵı apattyń naqty sebepterin anyqtap jatyr. Alaıda mamandardyń aıtýynsha, aýa raıynyń turaqsyzdyǵy men jaýyn-shashynnyń azdyǵy, sondaı-aq klımattyq ózgerister orman órtiniń taralýyna áser etýi múmkin.