Búgin, 10 maýsymda QR Mádenıet jáne aqparat mınıstri Aıda Balaeva Qazaqstandaǵy Belarýs Respýblıkasynyń Tótenshe jáne О́kiletti Elshisi Alekseı Bogdanovpen kezdesti, dep habarlaıdy Egemen.kz Mádenıet jáne aqparat mınıstrliginiń baspasóz qyzmetine silteme jasap.
Kezdesý barysynda eki tarap aldaǵy birlesken is-sharalardy talqylady.
Atap aıtqanda, Qazaqstanda Belarýs mádenıetiniń kúnderin ótkizý týraly bastama kóterildi. Aıda Balaeva bul is-sharanyń aıasyn keńeıtýdi usyndy. Dástúrli konsertter men kórmelerden bólek, sheberlik sabaqtaryn, shyǵarmashylyq kezdesýlerdi, ǵylymı konferensııalardy jáne mádenıet salasyndaǵy ózara baılanystardyń ózge de túrlerin qamtý týraly aıtyldy.
Sonymen qatar, «Listapad» kınofestıvali aıasynda Qazaqstan kınosynyń kúnderi ótedi. Qazirgi ýaqytta is-sharany ótkizýge qatysty máseleler men kórsetiletin fılmderdiń tizimi naqtylanýda. Budan bólek, 10–11 shilde kúnderi Vıtebsk qalasynda ótetin halyqaralyq «Slavıan bazary» festıvaline de qazaqstandyq ónerpazdar qatysady.
Kezdesý sońynda mınıstr Qazaqstan tarapy eki eldiń mýzeı, teatr men arhıv qyzmetteri arasyndaǵy yntymaqtastyqty nyǵaıtýǵa, sondaı-aq birlesken kınoóndiris pen konserttik jobalardy damytýǵa úles qosýǵa daıyn ekenin bildirdi. Eki tarap jumys tobyn qurýǵa kelisti. Bul bastamalar eki el arasyndaǵy dostyq pen ózara túsinistikti nyǵaıta túsedi.