Almatyda «Álemdik óner galereıasy: XXI ǵasyr sýretshileri» atty halyqaralyq kórme esik ashty. Shyǵys pen Batysty, ótken men bolashaqty jalǵaǵan shyǵarmashylyq alań halyqtar arasyndaǵy mádenı dıalogti jandandyrýdy kózdeıdi.
Elimizde bastaý alǵan joba Fransııa, Ispanııa, Kavkaz elderinde jalǵasyn taýyp, álem mádenıetindegi beıneleý ónerdiń búgingi órisin qamtyǵan kóshpeli kórmege ulaspaq. Kórmeniń jetekshisi – Qazaqstan Sýretshiler odaǵynyń múshesi, mádenıet qaıratkeri Bolat Hamzın. Ol buǵan deıin de túrki halyqtarynyń tarıhyn beıneleıtin panoramalyq sýret jobasyn júzege asyrýǵa atsalysqan. Qylqalamǵa ilingen kórkem týyndylardyń ózeginde adamdy izgilikke, dostyq pen meıirimge úndeıtin shyǵarmalar kóp deıdi óner ıesi.
«О́ner tili – adamzatqa ortaq. Kórkem týyndylar ultqa, memleketke bólinbeıdi. Ol adamzattyń jan dúnıesin tazartýǵa, álemge meıirim men beıbitshilik uıalatýǵa qyzmet etýge tıis. Naǵyz óner zulymdyqqa qarsy turyp, adamgershilikti, beıbitshilikti nasıhattaıdy. Munda qoıylǵan kartınalardyń basty mıssııasy – kórermendi sezimge bóleý, oılandyrý, kerek bolsa qutqarý. Búgingi kórmege elimizdiń birqatar úzdik sýretshileriniń týyndylary qoıyldy. Tehnologııa múmkindikterin paıdalanyp, onlaın kórme arqyly sheteldik áriptesterimizdiń týyndylarymen tanysyp, ózara oı-pikir almasýdyń sáti tústi. Bizdi biriktiretin kúsh – shyǵarmashylyq pen dostyq», deıdi Bolat Hamzın.
Kórme ekspozısııasynda zamanaýı beıneleý óneriniń úzdik týyndylary usynylǵan. Sonymen qatar Uly Jibek jolynyń tarıhy men murasyn nasıhattaıtyn mádenı-aǵartýshylyq baǵyttaǵy kartınalardy da kózimiz shaldy. Qazaq dalasynyń baı tabıǵaty, salt-dástúri men turmys-tirshiligi, salqar dalany kezgen ańyz-dastandar, dostyq pen mahabbat, adaldyq pen erlik taqyryptary boıaý tilinde sóıleıdi.
«Jazǵan-syzǵanyńda ushqyr qııal, utymdy sheshimnen bólek kóńil tolqytar sezim qylań bermese ómirsheń týyndyny ómirge ákeldim deý beker. Al ondaǵy sezim ıirimderin árkim ártúrli qabyldaıdy, óz kórgen-túıgenimen ushtastyrady, sol arqyly shyǵarmaǵa jan bitedi. Rasymen de, beıneli shyǵarmany baǵalaý ólshemin qarapaıym kórermenniń kóńil túısigine qaldyrǵan durys», deıdi kórmede jumystaryn usynǵan sýretshi Kamıl Mamýkadze.
Jobanyń júzege asýyna Halyqaralyq mádenı dıplomatııa qaýymdastyǵy, Fransııadaǵy IýNESKO klýby men óner janashyrlary muryndyq bolǵan. Kavkazdaǵy baǵdarlamanyń jetekshisi – mádenıettanýshy, pedagog Rozetta Marysheva, aldaǵy ýaqytta rýhanı-dostyq ráýishtegi óner jármeńkesi álem elderin sharlaıtynyn, sol arqyly ómir súrý salty bir-birimen múlde qabyspaıtyn elder mádenı dıalog ornatyp, shyǵarmashylyq baılanystyń joly keńeıetinin aıtady.
ALMATY