Almatyda áleýmettik kásipkerlerge bıznesterin ornalastyrýǵa arnalǵan úı-jaılardy jeńildetilgen sharttarmen berý qolǵa alyndy. Mundaı jalǵa alý quny QQS esebimen 0,1 AEK nemese bir sharshy metr úshin 440,3 teńge (2025 jylǵa arnalǵan AEK-ke sáıkes). Bul megapolıstegi jalǵa alýdyń naryqtyq qunynan áldeqaıda arzanǵa túsip otyr, dep jazady Egemen.kz.
Mysaly, «Almaty» áleýmettik-kásipkerlik korporasııasy mańyzdy jobalardy iske asyratyn 30 kásipkerge jeńildikti sharttarmen turǵynúı emes ǵımarattardy jalǵa berdi.
Úı-jaılar korporasııa balansynda qolaıly jyljymaıtyn múlik nysandardyń paıda bolýyna qaraı «Almaty» ÁKK saıtynda ótkiziletin ashyq konkýrs negizinde usynylady. Bul baıqaýǵa áleýmettik baǵdarlanǵan jobany iske asyratyn kez kelgen kásipker qatysa alady. Ádette, ınklıýzııa, densaýlyq saqtaý, bilim berý jáne kreatıvti ındýstrııa salalaryndaǵy bastamalardy qoldaýǵa basymdyq beriledi.
Jeńimpazben jaldaý sharty óndirip alý quqyǵynsyz uzartý múmkindigimen úsh jylǵa deıingi merzimge jasalady. Budan basqa, «Almaty» ÁKK-de eki aılyq jeńildikti kezeń qarastyrylǵan, ondaı kezdekásipkerden jaldaý aqysy alynbaıdy. Nysandar aǵymdaǵy kúıde beriledi, al Jalǵa alýshy jóndeý jumystaryn júrgize alady.
Qazirgi tańda qoldaý tapqan jobalardyń qatarynda múgedekterdi beıimdeý, ońaltý ortalyqtary, erekshe bilim berý qajettilikteri bar balalarǵa arnalǵan logopedııalyq, defektologııalyq, sensorlyq jáne neıropsıhologııalyq baǵyttaǵy kýrstar, sondaı-aq áıelderge, jasóspirimder men zeınetkerlerge arnalǵan shyǵarmashylyq sheberhanalar men úıirmeler bar.
Qalada jumys oryndaryn qurý máselelerine erekshe nazar aýdarylatyndyqtan, halyqtyń áleýmettik osal toptary sanatyndaǵy áıelderdi jumysqa ornalastyra otyryp, tigin óndirisi uıymdastyrylyp otyr.
Memleket pen áleýmettik bıznestiń áriptestik tetigi aıasynda Almatyda barlyǵy 221 jańa jumys orny quryldy.